|
 Bakı
Pedaqoji Kadrların İxtisasartırma və Yenidənhazırlanma
İnstitutunun rektoru professor Asəf Zamanov Sinqapurun
EDUCARE şirkətinin baş icraçı direktoru Mayk Tirumanın
dəvəti ilə 15-21 dekabr 2014-cü il tarixlərdə Sinqapurda
səfərdə olmuşdur. Qeyd edək ki, BPKİYİ və EDUCARE
təşkilatı arasında əlaqələr 2013-cü ilin əvvəllərindən
başlamış və 29 aprel 2013-cü ildə təhsil sahəsində
əməkdaşlığa dair müqavilənin imzalanması ilə
rəsmiləşdirilmişdir.
Səfər zamanı rektor EDUCARE təşkilatının rəsmisi
ilə görüşündə təşkilatın fəaliyyəti və görülən
işlərlə yaxından tanış olmuş, Azərbaycanın təhsil
sistemi, Bakı Pedaqoji Kadrların İxtisasartırma və
Yenidənhazırlanma İnstitutunun fəaliyyəti və təhsil
layihələri barədə söhbət aparmış, birgə görülməsi mümkün
olan işlər müzakirə edilmişdir. A.Zamanov Sinqapurun
Bedok South Secondary School, İnstitute of Technical
Education və Nanyang Technological University kimi orta
və ali təhsil müəssisələrində olmuşdur. Həmin
təşkilatların rəhbərləri ilə keçirilən görüşlərdə
bu təhsil müəssisələrinin iş prinsipi, tədrisin
təşkili, mütəxəssis hazırlığının mexanizmi,
maddi-texniki bazası və kadr seçimi haqqında ətraflı
məlumat alaraq yüksək səviyyədə təchiz edilmiş
auditoriya və elmi laboratoriyalarla yaxından tanış
olmuşdur. İnstitute of Technical Education-ın direktor
müavini Dr.Vaidyanathan Kripesh İTE-nin fəaliyyəti
haqqında geniş məlumat vermiş, hazırlanan yüksək
səviyyəli mütəxəssis və kadrlara Sinqapurda olduqca
böyük tələbat olduğunu qeyd etmişdir. Görüşün sonunda
İTE-nin direktor müavini professor Asəf Zamanova bu
təhsil müəssisəsinin materiallarından ibarət
nəşrləri hədiyyə etmişdir.
Səfər zamanı rektor A.Zamanovun EDUCARE şirkətinin baş
icraçı direktoru Mayk Tirumanla görüşü də əhəmiyyətli
olmuşdur. M.Tiruman Bakıya səfərini və BPKİYİ-də
keçirilən görüşü xatırlayaraq, yaranan bu ikitərəfli
əməkdaşlıqdan məmnunluğunu bildirmişdir. O, həmçinin,
müəllim hazırlığının keyfiyyətinin yüksəldilməsi üçün
BPKİYİ-də də Tatarıstanda EDUCARE şirkəti tərəfindən
həyata keçirilən eyni məqsədli layihənin tətbiqinin
uğurlu nəticələr verəcəyinə əminliyini bildirmişdir.
Görüş sonrası A.Zamanov M.Tirumana "Beynəlxalq
əməkdaşlığın uğurları (2008-2013-cü illər)" kitabını,
həmçinin Azərbaycanla bağlı milli dəyərləri əks etdirən
hədiyyələr təqdim etmişdir.
Rektor Asəf Zamanovun həmçinin EDUCARE təşkilatının
Tatarıstanla bağlı təhsil layihəsinin rəhbəri ilə görüşü
olmuş, Bakı Pedaqoji Kadrların İxtisasartırma və
Yenidənhazırlanma İnstitutunda müəllimlərin
ixtisasartırmasının həyata keçirilmə mexanizmi və
EDUCARE təşkilatının təhsil layihələri barədə geniş
müzakirə aparılmışdır.
Qeyd etmək yerinə düşər ki, institutun beynəlxalq
əlaqələrinin inkişafında Təhsil Nazirliyinin rolu
danılmazdır.
Mətbuat xidməti |
