|
 Dekabrın
24-də Gəncə Dövlət Universitetində Qarabağ müharibəsinin
döyüşçüsü İbad Hüseynovla universitetin
professor-müəllim heyəti və tələbələrinin görüşü
keçirilib.
Görüşü giriş sözü ilə universitetin rektoru, professor
Yusif Yusubov açaraq müstəqilliyimiz, azadlığımız
yolunda, Qarabağ uğrunda döyüşlərdə həlak olmuş
şəhidlərin ruhunu yad edib, xatirələrinin qəlblərdə daim
yaşadığını bildirib. Qarabağ döyüşlərinin qəhrəmanı İbad
Hüseynov görüş iştirakçılarına təqdim edilib. Rektor
qəhrəman döyüşçü ilə görüşün universitet kollektivi
üçün əlamətdar olduğunu diqqətə çatdırıb, həyat və
döyüş yolu əfsanələşmiş, iftixar nümunəsinə çevrilmiş bu
insanın gənclik üçün əsl vətənpərvərlik timsalına,
simvoluna çevrildiyini vurğulayıb. Rektor Yusif Yusubov
İ.Hüseynovun döyüş yolundan söz açıb. Öz igidliyi ilə
türk dünyasının da qəhrəmanına çevrilmiş bu döyüşçünün
hələ 21 yaşında ikən özündən yaşca və cüssəcə xeyli
böyük olan, Ermənistanın "milli qəhrəman, şərəfli igid"
adı verdiyi, ASALA terror təşkilatının Qərb başqanı Ave
Monte Melkonyanla təkbətək əlbəyaxa döyüşdə qalib
gələrək onu öldürdüyünü bildirib. Qeyd edib ki, mənfur
erməni öz quldur dəstəsi ilə Qarabağ kəndlərində
soyqırımı yaratmış, yüzlərlə həmvətənimizin başını
kəsmiş, saysız-hesabsız qəddarlığı ilə məşhur olmuşdur.
Belə bir qəddar düşməni məhv edən vətən oğlu ilə təkcə
bugünkü yox, gələcək nəsillər də fəxr edəcəklər. Görüşə
gəldiyi üçün qəhrəmana təşəkkür edən rektor onu
tribunaya dəvət edib.
Təvazökarlıq edərək öz döyüş yolundan, göstərdiyi
igidliklərdən söhbət açmayan qəhrəman vətən, xalq üçün,
qeyrət uğrunda, qızlarımızın, gəlinlərimizin ismətini
qorumaq naminə vuruşduqlarını bildirib.
Tədbirdə çıxış edən "Sən bu yurdun İbadısan" mahnısının
müəllifi Tahir Əkbər, "Atilla" jurnalının baş redaktoru
Gülşən Mehdiyeva və başqaları öz xarici görünüşü ilə
digər insanlardan fərqlənməyən İbadın Mübariz İbrahimov
kimi neçə-neçə oğullara qəhrəmanlıq nümunəsi olduğunu
bildiriblər.
Görüşün sonunda İbad Hüseynova həsr edilmiş sənədli film
nümayiş etdirilib, Tahir Əkbərin "Sən bu yurdun
İbadısan" mahnısı səsləndirilib. Qəhrəmana universitet
adından hədiyyə təqdim olunub.
Maqbet ƏHMƏDOV,
Gəncə Dövlət Universiteti Mətbuat xidmətinin rəhbəri |
