|
Azərbaycan Respublikasının Prezidenti cənab İlham
Əliyevin 24 oktyabr 2013-cü il tarixli Sərəncamı ilə
təsdiq edilmiş "Azərbaycan Respublikasında təhsilin
inkişafı üzrə Dövlət Strategiyası"ndan irəli gələn
tədbirlər planına uyğun olaraq Təhsil Nazirliyi
tərəfindən sistemli tədbirlər həyata keçirilir. Həmin
tədbirlərdən biri də ali təhsil müəssisələrində məsul
vəzifələrdə çalışan əməkdaşların ixtisasının artırılması
ilə bağlıdır.
Bu məqsədlə Azərbaycan Respublikasının bəzi regionları
da daxil olmaqla 15 dövlət ali təhsil müəssisəsinin
məsul əməkdaşları qardaş Türkiyə Cümhuriyyətinin
tanınmış universitetlərinə stajkeçmə üçün ezam olunub.
Sumqayıt Dövlət Universitetini bu layihədə Qiyabi,
distant və əlavə təhsil üzrə prorektor Qafar Nəriman
oğlu Atayev təmsil edib.
Qafar Atayev bildirib ki, layihənin əsas məqsədi Türkiyə
Respublikasının təcrübəsindən istifadə etməklə ölkəmizdə
təhsilin daha yaxşı idarə olunmasının üsul və
metodlarını öyrənmək idi. Proqramın nəzəri hissəsi
Türkiyə və Yaxın Şərq Dövlət İdarəçilik İnstitutunda
(TODAİE), praktik hissəsi isə Türkiyənin müxtəlif
universitetlərində - TODAİE, Anadolu, Ankara, Qazi,
Hacettepe, ODT (Yaxın Şərq Texniki), Bilkent və s.
universitetlərində keçirilib.
Mətbuat xidməti |
