|
Təhsil Nazirliyi "Kiçikyaşlı məktəblilər üçün ən yaxşı
nəsr, nəzm və dram əsərləri" adlı müsabiqə elan edib.
Müsabiqənin keçirilməsində əsas məqsəd yaş psixologiyası
nəzərə alınmaqla, kiçikyaşlı məktəblilərə mənəvi
zənginlik, vətənpərvərlik, milli və ümumbəşəri dəyərlər,
emosional və idraki keyfiyyətlər aşılayan, onların bədii
zövqünün inkişafını şərtləndirən ədəbi əsərlərin
yazılmasını stimullaşdırmaqdan ibarətdir.
Müsabiqəyə təqdim ediləcək əsərlər toplu şəklində
hazırlanmalıdır. Topluya daxil olan əsərlərin sayı və
ümumi həcmi aşağıdakı qaydada müəyyən edilir:
Nəsr əsərləri - 15 (1,5-2 çap vərəqi)
Nəzm əsərləri - 20 (1-1,5 çap vərəqi)
Dram əsərləri - 5 (2-2,5 çap vərəqi)
Müsabiqəyə təqdim edilən toplular çap olunmuş 3 (üç)
nüsxədə və diskə yazılmış elektron variantı (PDF
formatda) ilə birlikdə 1 iyun 2015-ci il tarixindən
başlayaraq 1 (bir) ay müddətində qeydiyyat üçün Təhsil
Nazirliyinə göndərilməlidir. Toplulara müəlliflərin
indiyədək nəşr olunmuş əsərlərinin daxil edilməsinə yol
verilmir.
Toplulardakı əsərlərə Təhsil Nazirliyinin müəyyən etdiyi
ekspert qrupları tərəfindən baxılacaq və müvafiq
toplulardakı nəsr əsərlərindən 12-si, nəzm əsərlərindən
15-i, dram əsərlərindən 3-ü müsbət dəyərləndirildiyi
halda, həmin toplular müsabiqəyə buraxılacaq.
Müsabiqəyə buraxılmış toplular mükafat yerlərinə uyğun
qiymətləndirilmək üçün elektron variantda ümumi təhsil
müəssisələrinə, tanınmış pedaqoqlara, qabaqcıl
müəllimlərə göndəriləcək. Həmçinin, qeyd olunan əsərlər
ictimaiyyətin rəyini öyrənmək məqsədilə Təhsil
Nazirliyinin rəsmi internet saytında
(http://www.edu.gov.az) yerləşdiriləcək. Rəy və
mülahizələr eser.musabiqe@edu.gov.az elektron poçtu
vasitəsilə qəbul ediləcək.
Müsabiqənin nəticələrinə əsasən, I yerə layiq görülən
əsərə görə 5000 (beş min), II yeri tutan əsərə görə 3000
(üç min), III yerə layiq görülən əsər üçün isə 1500 (min
beş yüz) manat mükafat fondu müəyyənləşdirilib.
Qalib əsərlərin kitab (antologiya) şəklində çap olunması
nəzərdə tutulur. |
