|
 Fatma
MUSTAFAZADƏ,
Bakı şəhər 20 nömrəli tam orta məktəb-liseyin kimya
müəllimi, "Ən yaxşı müəllim" müsabiqəsinin qalibi,
əməkdar müəllim
Azərbaycan Respublikasının Prezidenti cənab İlham
Əliyevin Sərəncamı ilə təsdiq edilmiş "Ümumtəhsil
məktəblərinin İKT ilə təminatı Proqramı" təhsilin
inkişafında tarixi nailiyyət kimi qiymətləndirilir.
Təhsilin keyfiyyəti onun məzmununun tələbata uyğun
müəyyənləşdirilməsindən birbaşa asılıdır. Bu mənada
İKT-dən istifadə tədris zamanı əyaniliyi,
informasiyaların qəbulolma sürətini, tədris prosesinə
şagirdlərin marağını artırır, müəllim əməyini
yüngülləşdirir.
Müasir tədris prosesində multimedia sistemlərinin
tətbiqinin böyük əhəmiyyəti vardır. Motivasiyaların
yaradılması, mövzuya aid materialların təqdimatı,
tətbiqi suallarla şagirdlərin işlədilməsi onlarda
mövzuya dair geniş, aydın təsəvvür yaradır. Bu baxımdan
"ağıllı lövhə"lərin (MİMİO elektron lövhəsi, "Prometan"
lövhəsi və s.) məktəblərdə istifadəsinin faydası
böyükdür.
Ölkəmizdə təhsil sistemində müxtəlif fənlər üzrə
elektron təlim materialları və əyani vəsaitlər
hazırlanıb məktəblərin istifadəsinə verilmişdir. Fənlər
üzrə Təhsil Portalında olan mövzulara aid elektron
resurslardan, "İnnovativ Tədris Mənbələri" şirkətinin
hazırladığı kimya, biologiya, Azərbaycan tarixi, ibtidai
siniflərdə riyaziyyat, ana dili, həyat bilgisi, ingilis
dili fənləri üzrə multimedia elektron resurslarından
məktəbimizin müəllimləri dərslərində istifadə edir,
internetin geniş imkanlarından yararlanıb təqdimatlar
hazırlayırlar. Müxtəlif fənlər üzrə audiovizual
vəsaitlər milli tədris proqramlarına əsaslanmışdır.
Kimya fənni üzrə resurslar ümumi, həm də qeyri-üzvi
kimyaya aid hazırlanmışdır. Hər biri 2 hissədən
ibarətdir. Ümumi kimyaya aid dərslər 7, 8, 9-cu,
qeyri-üzvi kimyaya aid dərslər 7, 8, 9, 10-cu sinifləri
əhatə edir. Dərslərdəki animasiyalı slaydlardan
ümumiləşdirmə və nəticə mərhələsində istifadə etmək
olar. Hər mövzudan sonra şəkillərlə verilən testlərlə,
praktik testlərlə dərsin yaradıcı tətbiqetmə və ya
möhkəmləndirmə mərhələsində şagirdlərin qazandıqları
bilikləri yoxlamaq mümkündür. Yoxlama düyməsinin
köməyilə cavabların düzgünlüyünü dərhal yoxlamaq olur.
Qeyri-üzvi kimya hissəsində elementlərin təbii
birləşmələri, mineralların şəkilləri slaydlarla verilir.
Eyni zamanda mövzuya aid maraqlı xəbərlər, kimyaçı
alimlərə aid məlumatlar, kimyəvi lüğət şagirdlərin
dünyagörüşlərinin artmasına səbəb olur. Kimya
kabinetlərində sorucu şkafların, bir çox reaktivlərin
olmaması səbəbindən dərs zamanı bir çox təcrübələr
göstərilmir. Bu resurslarda mövzulara aid təcrübələrin
videonümayişi kimyəvi reaksiyalar haqda həm təsəvvür
yaradır, həm də təhlükəsizlik baxımından əlverişlidir.
Bu resurslardan şagirdlər də istifadə edib biliklərini
zənginləşdirə bilər.
Mən avqust-sentyabr aylarında kimya fənn kurikulumunun
tətbiqi ilə əlaqədar təlimçi kimi Zaqatala, Balakən,
Göyçay rayonlarında oldum. Bu rayonlarda savadlı, peşə
fəaliyyətini sevən, yaradıcı, təşəbbüskar müəllimlərlə
tanış oldum. Dərslərini elektron resurslarla
zənginləşdirən müəllimlərimiz çoxdur. Kənd məktəblərində
dərslərində internetin imkanlarından istifadə edə
bilməyən müəllimlərin USB yaddaş kartlarında təqdim
olunan multimedia tədris resurslarından istifadə
etmələri sevindirici haldır. Yaradıcı müəllim hər bir
şəraitdə öz fəaliyyətini lazımi istiqamətdə qurmağı
bacarır. Mən bu bacarığı həmin rayonlardakı
müəllimlərin fəaliyyətində gördüm.
Müəllim cəmiyyət və dövlətin maraqları naminə öz peşə
fəaliyyətini keyfiyyətlə və səmərəli yerinə yetirməyə
borcludur. |
