|
 Dekabrın
11-də Sumqayıt Dövlət Universitetində ümummilli lider
Heydər Əliyevin anım günü münasibətilə tədbir keçirildi.
İlk öncə ulu öndərin universitetin foyesində qoyulmuş
büstü önünə gül dəstələri qoyuldu.
Tələbələrin ifasında Azərbaycan Respublikasının Dövlət
himni səsləndirildi. Sonra Sumqayıt Dövlət
Universitetində yaradılmış Heydər Əliyev Mərkəzinin
açılışı oldu.
Təhsil nazirinin müavini Firudin Qurbanov, Sumqayıt
Şəhər İcra Hakimiyyəti başçısının müavini Elgin
Həbibullayev Heydər Əliyev Mərkəzinin açılışında iştirak
etdilər.
Mərkəzdə qonaqlar və universitetin kollektivi türk
dünyasının böyük oğlu, müstəqil Azərbaycan dövlətinin
memarı və qurucusu Heydər Əliyevin qranitdən hazırlanmış
barelyefi, ona aid kitablar və sənədlərlə tanış oldular.
Mərkəzdə ulu öndərin uşaqlıq, yeniyetməlik, tələbəlik,
Dövlət Təhlükəsizlik Komitəsində işlədiyi dövr,
hakimiyyətdə olduğu illər fotolarda slayd şəklində öz
əksini tapmışdır. Universitetin foyesində Prezident
İlham Əliyevə həsr olunmuş fotogüşə tədbir
iştirakçılarının diqqət və marağına səbəb oldu.
Tədbirdə SDU-nun rektoru Elxan Hüseynov çıxış edərək
bildirdi ki, istər Azərbaycan tarixində, istərsə də
xalqın yaddaşında Heydər Əliyev müstəqil və suveren
dövlətin simvolu, əvəzsiz siyasət dahisi, cəsur insan
və ən böyük vətəndaş kimi qalmışdır. O, Azərbaycanın ən
yeni tarixində bütöv bir dövrü özündə təcəssüm etdirən,
müstəqil dövlətin siyasi, iqtisadi, hüquqi,
sosial-mədəni, elmi əsaslarını yaradan, onların ardıcıl
inkişafını təmin edən siyasi kursun və milli inkişaf
strategiyasının müəllifidir. Bu gün müstəqil
Azərbaycanda elə bir sahə yoxdur ki, onun inkişafında
Heydər Əliyevin zəhməti və xidməti olmasın.
Vurğulandı ki, ulu öndərin xalq üçün gördüyü neçə-neçə
tarixi xidmətləri, fədakarlıqları var. Təkcə bu misal
ümummilli liderin həm yaddaşımızda, həm də
azərbaycanlıların qəlbində tutduğu müstəsna tarixi yer
haqda təsəvvür əldə etməyə imkan verir. Həm də göstərir
ki, Heydər Əliyevin xidmətləri dünya siyasi
sistemlərində müəyyən edilən "milli lider" çərçivəsinin
hüdudlarına sığmır.
Rektor çıxışında vurğuladı ki, universitetimizdə belə
bir Mərkəzin açılışı ulu öndərin zəngin və çoxşaxəli
irsinin öyrənilməsində və təbliğində, tələbələrin
həyatında mühüm rol oynayacaq. Bu elm məbədinin tarixi
keçmişinə qısa nəzər salsaq görərik ki, binanın daş
yaddaşı belə Heydər Əliyevin imzaladığı fərman və
sərəncamı ilə möhürlənib. Uzun illər Azərbaycan Sənaye
İnstitutu olan bu təhsil ocağının 13 iyun 2000-ci ildən
Sumqayıt Dövlət Universiteti kimi fəaliyyət göstərməsi
ulu öndər Heydər Əliyevin müstəqillik illərində də elm
və təhsilin inkişafını daim diqqətdə saxlamasının bariz
nümunəsidir. Bu sahədə mövcud olan problemlərin aradan
qaldırılması və Azərbaycanda dünyanın inkişaf etmiş
ölkələrinin təcrübəsinə uyğun təhsil strategiyasının
həyata keçirilməsi məqsədilə ciddi tədbirlər həyata
keçirmişdir.
Rektor Sumqayıt Dövlət Universitetində belə bir Mərkəzin
açılmasında göstərdiyi diqqət və qayğıya görə təhsil
naziri Mikayıl Cabbarova və Sumqayıt Şəhər İcra
Hakimiyyətinin başçısı Eldar Əzizova universitetin
professor və müəllim heyəti adından öz xüsusi
təşəkkürünü bildirdi.
Təhsil nazirinin müavini Firudin Qurbanov çıxışında
vurğuladı ki, Azərbaycan təhsilinin bugünkü inkişafı öz
mənbəyini ötən əsrin 70-ci illərindən ümummilli lider
Heydər Əliyevin rəhbərliyi ilə aparılan uzaqgörən və
məqsədyönlü siyasətdən alıb, o vaxtdan başlayan qlobal
miqyaslı təhsil quruculuğu sonrakı inkişaf üçün güclü
təməl olub. Azərbaycanda ali təhsil də Heydər Əliyev
dövründə inkişafa qədəm qoyub.
Firudin Qurbanov Heydər Əliyevin kadr siyasətindən
danışaraq bildirdi ki, müdrik dövlət başçısının daha bir
xidməti həmin illərdə azərbaycanlı gənclərin keçmiş
SSRİ-nin ən nüfuzlu ali məktəblərinə oxumağa
göndərilməsi idi. O vaxt 15 mindən çox gənc
Azərbaycandan kənarda ali təhsil almışdır. İndi həmin
gənclər dövlətin idarə edilməsində, inkişafında mühüm
rol oynayan məsul vəzifələrdə çalışırlar.
Bu gün SDU-da belə bir Mərkəzin yaradılması, Heydər
Əliyev irsinin öyrənilməsi tələbələr üçün qiymətli
mənbədir.
Sumqayıt Şəhər İcra Hakimiyyəti başçısının müavini Elgin
Həbibullayev çıxış edərək Azərbaycanın özü qədər əbədi
olan Heydər Əliyevin mənalı ömür yolundan, dövlətimiz və
xalqımız qarşısındakı əvəzsiz xidmətlərindən bəhs etdi.
Bildirdi ki, ötən əsrin 40-cı illərində yaradılan
Sumqayıt məhz 70-ci illərdən başlayaraq ümummilli lider
Heydər Əliyevin qayğısı nəticəsində təkcə
respublikamızda deyil, dünya miqyasında tanınan yaşayış
mərkəzi olmuşdur.
Vurğulandı ki, ulu öndər Heydər Əliyev siyasi
fəaliyyətinin bütün dövrünü insanların sosial rifahına,
xalqların dostluğuna, tərəqqiyə və inkişafa, elm və
təhsilin, mədəniyyətin çiçəklənməsinə həsr etmişdir.
Ümummilli liderimizin əziz xatirəsi Azərbaycanla yanaşı,
xarici ölkələrdə də ehtiramla anılır.
Qeyd edildi ki, mərkəz Heydər Əliyev irsinin dərindən
öyrənilməsi və gənclərin intellektual səviyyələrinin
yüksəldilməsində mühüm əhəmiyyətə malik olacaqdır.
Sonra fəlsəfə və hüquq kafedrasının müdiri, professor
Həsən Sadıqov, Avropa və Amerika ölkələrinin yeni və ən
yeni tarixi kafedrasının müdiri, professor Şirxan
Səlimov, Azərbaycan tarixi kafedrasının müdiri, dosent
Əmirxan İsayevin məruzələri dinlənildi.
Mətbuat xidməti |
