|
ABŞ-da dünya universitetlərinin ilk reytinq cədvəli
tərtib olunub
Amerikanın "US News and World Report" jurnalı özünün
dünya universitetlərinin ilk reytinq cədvəlini
açıqlayıb. Reytinq cədvəlində ayrı-ayrı
universitetlərin (500 ali məktəb) göstəriciləri Böyük
Britaniyanın QS, Times Higher Education və Şanxay
reytinq sıralamalarındakı göstəricilərdən fərqlənir.
Jurnal universitetləri elmi məqalələr, sitatgətirilmə,
qlobal reputasiya da daxil olmaqla 10 kriteriya və 20
elmi sahə üzrə qiymətləndirib. ABŞ-ın Harvard
Universiteti 20 elm sahəsindən 10-u üzrə liderdir. Daha
sonra 4 elm sahəsi ilə Massaçusets Texnologiya
İnstitutu və 2 elm sahəsi üzrə Kaliforniya Berkli
Universiteti gəlir. Hollandiyanın Vagenin Universiteti
kənd təsərrüfatı elmləri sahəsində ilk yeri tutmuş
yeganə qeyri-Amerika universitetidir. Böyük
Britaniyanın Oksford və Kembric universitetləri ilk
10-luqda yer almış qeyri-Amerika ali məktəbləridir.
Onlar müvafiq olaraq 5-ci və 6-cı sıralarda yer
alıblar. London İmperial Kolleci reytinqdə 12-ci
sıradadır. Kanadanın Toronto Universiteti reytinqdə
14-cü sırada qərarlaşıb. QS, Times Higher Education və
Şanxay reytinq sıralamalarında ən reytinqli yerlərdə
(12, 13 və 19-cu yerlərdə) olan İsveçrənin Sürix Ali
Texnik Məktəbi "US News and World Report" jurnalının
sıralamasında 26-cı yerdədir. "US News"un versiyasına
görə, 24-cü yerdə olan Tokio Universiteti Asiyanın ən
yaxşı ali məktəbidir. Reytinq sıralamasında Sinqapur
Milli Universiteti Pekin və Honkonq universitetlərindən
sonra 55-ci yerdədir.
Dünyanın ən yaxşı tələbə şəhərlərinin adları açıqlanıb
Böyük Britaniyanın Quacquarelli Symonds (QS) konsaltinq
şirkəti dünyanın ən yaxşı 50 tələbə şəhərinin (QS Best
Student Cities 2015) adlarını açıqlayıb. Tərtibçilər
şəhərləri qiymətləndirərkən QS World University Rankings
sıralamasına daxil olan universitetlərin sayı, həyat
səviyyəsi, tələbə-əhali nisbəti, təhsil və kirayə
haqları, eləcə də gələcəkdə işlə təmin olunma
imkanları kimi kriteriyaları əsas götürüblər. Tədqiqat
gedişində əhalisinin sayı 250 mindən artıq, ərazisində
ən azı dünya reytinqlərində 2 ali məktəbi olan 116 şəhər
təhlil olunub. Reytinqə 3 ildir fasiləsiz olaraq Paris
başçılıq edir. Melburn 6-cı yerdən 2-ci yerə qalxaraq
öz mövqeyini xeyli yaxşılaşdırıb, London isə 3-cü yerə
enib. Rusiyanın reytinqdə yeganə şəhəri olan Moskva
38-ci yerdən 43-ə keçməklə öz mövqeyini pisləşdirib.
Ən yaxşı tələbə şəhərlərinin ilk 10-luğuna aşağıdakılar
daxildir: 1.Paris, 2.Melburn, 3.London, 4.Sidney, 5.
Honkonq, 6.Boston, 7. Tokio, 8. Monreal, 9. Toronto,
10.Seul.
Oksford Universitetinə tələbə qəbulu rekord həddə çatıb
Böyük Britaniyanın "Teleqraf" qəzetinin məlumatına
əsasən, növbəti tədris ilində Oksford Universitetinə
qəbul uğrunda rekord sayda tələbə mübarizə aparacaq.
Əksinə, qəbul qaydalarının sərtləşdirilməsi ilə
əlaqədar olaraq Kembric Universitetinə tələbat
azalıb. Yeni məlumatlar göstərir ki, Oksford
Universitetinə qəbul olmaq üçün ərizələrin sayı rekord
səviyyəyə, 18325-ə çatıb. Ötən ilin eyni dövrü ilə
müqayisədə (17484 ərizə) artım təxminən 5% təşkil edib.
Ali məktəb tərəfindən ayrılmış 3100 yer uğrunda
abituriyentlər arasında sərt mübarizə gedəcəyi
bildirilir. Kembric Universiteti, əksinə, bildirib ki,
abituriyentlərin sayının artmasını "gözləmir" və
abituriyentlərin sayı haqqında məlumatları dərc etməkdən
imtina edib.
Bu il ilk dəfə olaraq Britaniyanın məşhur ali məktəbi
abituriyentlər qarşısında bir sıra tələblər qoyub ki,
bu da universitetə daxil olmaq arzusunda olanların
axınının azalmasına səbəb olub. Ötən il Kembric
Universitetində 3300 yer uğrunda 16720 namizəd mübarizə
aparıb. Oksfordun tələbələr üçün tələbləri əvvəlki
kimi qalıb. Bu da ona gətirib ki, əlaçılar öz
sənədlərini Kembric Universitetinə yox, onun əzəli
rəqibi olan Oksforda verməyə hazırlaşırlar.
İnternetdə pulsuz elmi kitabxana açılıb
UNESCO tərəfdaşlıq dəstəyi ilə İnternet şəbəkədə pulsuz
Ümumdünya elmi kitabxana açıb. Kitabxana alimlər,
müəllimlər və tələbələr tərəfindən internetdə müxtəlif
mətn və məqalələrin pulsuz istifadəsini təmin edəcək.
Hazırda kitabxana təxminən 70 video, 25 kitab, 300
məqalə, həmçinin əlaqələndirici vasitə rolunda çıxış
edəcək rəqəmli platformaya malikdir. Kitabxana hələlik
müvəqqəti olaraq UNESCO və "Nature Education"un
saytlarında (http://www.unesco.org/wls),
(http://www.unesco.org/wls)
yerləşdirilib.
Əcnəbi tələbələr Fransaya il ərzində 1,7 milyard avro
xeyir verir
Son tədqiqatlara görə, hazırda Fransada orta hesabla
295000 əcnəbi tələbə təhsil alır. Bu, əcnəbi tələbəni
qəbul edən ölkə üçün böyük imkanlar deməkdir. Tələbələr
burada pul xərcləyir, yerli universitetlərin
maliyyələşdirilməsinə və yeni iş yerlərinin açılmasına
xidmət edirlər. Əcnəbi tələbələr təhsil aldıqları
ölkədə mənzil, yemək, səhiyyə, nəqliyyat və əyləncə
üçün ayda 920 avro xərcləyirlər. Buna hələ təhsil
haqları da əlavə olunur. Əcnəbi tələbələrin ölkə
ərazisində sərf etdikləri vəsaitlərin ümumi həcmi 4,6
milyard avroya çatır. Əgər bu vəsaitdən yerli
özünüidarə orqanları tərəfindən əcnəbi tələbələr üçün
sərf olunan xərcləri ( ev, ərzaq və sosial müdafiə)
çıxsaq, dövlətin əldə etdiyi təmiz gəlir ildə 1,7
milyard avro təşkil edir.
Oruc MUSTAFAYEV,
"Azərbaycan müəllimi"
xarici mətbuat materialları əsasında |
