|
Gəncə Dövlət Universitetində Yeni laboratoriyanın
açılışı olub
 Noyabrın 28-də Gəncə Dövlət
Universitetinin kimya kafedrasında üzvi və bioloji kimya
laboratoriyasının açılış mərasimi olub. Mərasimdə Gəncə
Dövlət Universitetinin rektoru Yusif Yusibov ali təhsil
müəssisəsində görülən işlər və əldə olunan uğurlardan
danışıb. Bildirib ki, universitetin korpusları əsaslı
təmir olunub, texniki baza müasir tələblərə cavab verən
avadanlıqlarla təchiz edilib, bütün korpuslarda "ağıllı
lövhə"lər quraşdırılıb, daxili şəbəkə yenidən qurularaq
yüksək sürətli internetlə (15 Mb) təmin olunub. Rektor
qeyd edib ki, biz bundan sonra da universitetin müasir
texnologiyalarla təchizatına, tədrisin keyfiyyətinin
yüksəldilməsinə səy göstərəcək, təhsillə bağlı dövlət
siyasətinin həyata keçirilməsinə çalışacaq və möhtərəm
Prezidentimizin qayğısına öz əməli işimizlə cavab
verəcəyik.
Yeni laboratoriya həm kafedranın əməkdaşlarına, həm də
tələbələrə və magistrlərə gözəl hədiyyə olub. Bu
laboratoriyada fənlər əyani vəsaitlərdən istifadə
edilməklə tədris olunacaq və tədqiqat işləri aparılacaq.
Geniş texniki imkana malik olan laboratoriyada üzvi və
ya bioloji maddələrin fiziki parametrlərini
müəyyənləşdirmək mümkündür.
Rektorun iştirakı ilə "açıq dərs"
 Gəncə
Dövlət Universitetinin biologiya-kimya fakültəsində
botanika kafedrasının müdiri, biologiya elmləri doktoru,
əməkdar elm xadimi, professor Vaqif Novruzovun
biologiya müəllimliyi və biologiya ixtisasının II
kursunda "Taxıllar fəsiləsi" mövzusunda "açıq dərs"i
keçirilib. "Açıq dərs"də Gəncə Dövlət Universitetinin
rektoru, professor Yusif Yusibov, Azərbaycan Milli
Elmlər Akademiyasının Gəncə bölməsinin akademik katibi,
akademiyanın həqiqi üzvü, əməkdar elm xadimi Fuad
Əliyev, Azərbaycan Dövlət Aqrar Universitetinin kimya
kafedrasının müdiri, kənd təsərrüfatı elmləri doktoru,
professor Nazim Yusifov, Azərbaycan Texnologiya
Universitetinin iaşə məhsullarının texnologiyası və
turizm kafedrasının müdiri, biologiya elmləri doktoru
Əhəd Nəbiyev, Gəncə Şəhər Təhsil İdarəsinin əməkdaşı,
orta məktəblərdən ixtisas müəllimləri, eləcə də
ictimaiyyətin nümayəndələri iştirak ediblər.
Rektor Yusif Yusibov qonaqları və tələbələri
salamlayaraq son vaxtlar universitetdə görülən işlərdən,
tələbələr üçün yaradılan şəraitdən, təhsil və təchizat
sahəsindəki uğurlardan bəhs edbi. Professor Yusif
Yusibov eyni zamanda Prezident İlham Əliyevin xüsusi
qayğısı və dəstəyi ilə respublikamızda təhsillin
inkişafı, yeni məktəb binalarının tikintisi, müasir
tələblərə cavab verən maddi-texniki bazanın yaradılması
istiqamətində görülən işləri də xüsusi qeyd edib.
Bildirib ki, Gəncə Dövlət Universiteti də bu siyasəti
davamlı şəkildə həyata keçirən təhsil ocaqlarından
biridir. Universitet yüksək texnologiyanın vasitəsilə
təhsildə daha ciddi uğurlar qazanmaq üçün yeni-yeni
layihələr hazırlayır, onları reallaşdırır. Bu
layihələrdən biri də şəhər ictimaiyyəti nümayəndələrinin
iştirakı ilə "açıq dərs"lərin təşkilidir.
Professor Vaqif Novruzovun "ağıllı lövhə" vasitəsilə
keçdiyi "açıq dərs" nəinki tələbələrin, həm də
iştirakçıların marağına səbəb olub.
Akademik Fuad Əliyev belə bir maraqlı dərsi dinləmək
üçün dəvət edildiyinə görə öz təşəkkürünü bildirib.
Maqbet ƏHMƏDOV,
GDU-nun Mətbuat xidmətinin rəhbəri |
