|
 Azərbaycan
Təhsil Şurası artıq neçə illərdir ki, təhsilimizin
müxtəlif problemlərinə, yeniliklərin elmi-nəzəri
təhlilinə, qabaqcıl təcrübənin öyrənilib yayılmasına
həsr olunmuş tədbirlər təşkil edir. Bu tədbirlərdə
Təhsil Şurasının üzvü olan qabaqcıl müəllimlər, həmçinin
pedaqoji ictimaiyyətin nümayəndələri iştirak edirlər.
Şura bu sahədəki fəaliyyətini daha da genişləndirmək və
ona sistemli xarakter vermək üçün ötən il keçirilmiş və
təhsil naziri cənab Mikayıl Cabbarovun da iştirak etdiyi
hesabat konfransının nəticələrini əsas götürərək
"Təhsilin inkişafı üzrə Dövlət Strategiyasına Dəstək
Proqramı" təsdiq edib. Proqrama əsasən respublikamızın
regionlarında, həmçinin Bakının təhsil müəssisələrində
artıq bir sıra elmi-təcrübi konfranslar, görüşlər
keçirilib, müvafiq təkliflər irəli sürülüb.
Təhsil Şurasının Gürcüstanın Kobuleti şəhərində bu
şəhərin bələdiyyə idarəsi ilə birgə "Beynəlxalq təcrübə
mübadiləsi təlim keyfiyyətini yüksəldən vasitə kimi"
mövzusunda 13-15 noyabr 2014-cü il tarixlərində
keçirdiyi elmi-təcrübi konfrans da şuranın qəbul etdiyi
proqramın müddəaları əsasında gerçəkləşib.
Elmi-təcrübi konfransda Gürcüstanın Acarıstan
Respublikası Təhsil Nazirliyinin təhsil, mədəniyyət və
idman şöbəsinin müdiri Şuşana Surmanidze, Kobuleti
Resurs Mərkəzinin direktoru Madona Qoqitidze, Kobuleti
şəhər bələdiyyəsinin deputatı Arçil Çenteradze, eyni
zamanda şəhər təhsil ictimaiyyətinin nümayəndələri,
müəllimlər, məktəb rəhbərləri iştirak ediblər.
Konfransda Azərbaycan nümayəndə heyətini Təhsil Şurası
İdarə Heyətinin üzvləri - "Təhsil və zaman" qəzetinin
redaktoru Böyükağa Mikayıllı və Bakı şəhəri 129 nömrəli
tam orta mərtəbin direktoru Samir Mehdizadə, Bakı şəhəri
114 nömrəli tam orta məktəbin direktoru, respublikanın
əməkdar müəllimi Ceyran Novruzova, həmin məktəbin
direktor müavini Nailə Ələsgərova, Lənkəran Rayon Təhsil
Şöbəsinin müdir müavini Güloğlan Bağırov, Salyan şəhər 1
nömrəli humanitar fənlər təmayüllü liseyin müəllimi,
respublikanın əməkdar müəllimi Zabul Əhmədov və
başqaları - ümumilikdə 20-dən çox təhsil işçisi təmsil
edib.
Konfransı Azərbaycan Təhsil Şurası İdarə Heyətinin üzvü
Samir Mehdizadə açaraq "Təhsil müəssisələri arasında
əməkdaşlığın təlim keyfiyyətinin yüksəldilməsində rolu"
mövzusunda çıxış edib. S.Mehdizadə çıxışında
Azərbaycan-Gürcüstan münasibətlərinin mövcud durumundan,
təhsilin cəmiyyətin inkişafındakı rolundan, beynəlxalq
təcrübə mübadiləsinin təlim keyfiyyətinin
yüksəldilməsinə təsirindən, təcrübə mübadiləsi sahəsində
gələcək əməkdaşlığın istiqamətlərindən bəhs edib. Mövzu
ətrafında azərbaycanlı və gürcü müəllimlərin çıxışları,
müzakirələri olub. Qarşılıqlı fikir mübadiləsi aparılıb.
Tərəfləri maraqlandıran suallar cavablandırılıb.
Elmi-təcrübi konfransın ikinci iş günü Kobuleti şəhər 1
və 2 nömrəli orta məktəblərlə tanışlıqla başlayıb.
Nümayəndə heyətimizi hərarətlə qarşılayan kobuletili
müəllimlər həvəslə öz iş təcrübələrindən danışıb,
azərbaycanlı müəllimlərin tövsiyələrini dinləyiblər.
Konfrans iştirakçıları Kobuletinin 15 kilometrliyində
yerləşən Çakvin kənd orta məktəbi ilə də tanış olub,
məktəbin iki yüz nəfərdən ibarət olan rəqs ansamblının
çıxışlarına tamaşa ediblər.
Çakvin məktəbində Azərbaycan Respublikasının əməkdar
müəllimi, iki dəfə "Ən yaxşı müəllim" müsabiqəsinin
qalibi, Salyan şəhər Aşıq Pənah adına 1 nömrəli
humanitar təmayüllü məktəb-liseyin müəllimi Zabul
Əhmədovun 11-ci sinifdə "Vektorların skalyar hasili"
mövzusunda apardığı dərs maraq doğurub.
Elmi-təcrübi konfransda Təhsil Şurası İdarə Heyətinin
üzvü, "Təhsil və zaman" qəzetinin redaktoru Böyükağa
Mikayıllı "Azərbaycanda təhsil: nailiyyətlər,
perspektivlər" mövzusunsda məruzə edib. Məruzəçi
konfrans iştirakçılarının diqqətini Azərbaycan
təhsilində son illər həyata keçirilən tədbirlərin
dinamikasına cəlb edib, hazırda Azərbaycan təhsilinin
intibah dövrünü yaşadığını vurğulayıb.
Şirvan şəhər 11 nömrəli tam orta məktəbin müəllimi
Seyyub Əsədov konfransda informasiya - kommunikasiya
texnologiyalarında istifadə etməklə "Qarabağ xanlığı"
mövzusunda dərs nümayiş etdirib. Onun mövzunun verdiyi
imkanlardan istifadə edərək Qarabağın tarixi haqqında
faktlara əsaslanmaqla verdiyi məlumat gürcü
müəllimlərinin dərin marağına səbəb olub.
İsmayıllı şəhər 3 nömrəli tam orta məktəbin müəllimi
Çingiz Muradovun konfransda "Azərbaycanın xalq yazıçısı
Məmməd Arazın həyat və yaradıcılığı" mövzusunda nümayiş
etdirdiyi dərs də Azərbaycan mədəniyyətinin,
poeziyasının, mənəvi dəyərlərinin təbliği baxımından
mühüm əhəmiyyət daşıyıb.
Konfransda habelə Aşıq Pənah adına Salyan şəhər 1
nömrəli humanitar fənlər təmayüllü məktəb-liseyin
müəllimi, respublikanın əməkdar müəllimi Zabul Əhmədov
"Azərbaycanda təhsilin informasiyalaşdırılması", Bakı
şəhər 111 nömrəli tam orta məktəbin müəllimi Meliha
Əsədova "Azərbaycan və Gürcüstanın təhsil sahəsində
Avropaya inteqrasiyası", Şamaxı rayon Sabir qəsəbə 1
nömrəli tam orta məktəbin direktoru Gülnurə Babaşova
"Müəllim kadrlarının hazırlığı", Kobuleti Resurs
Mərkəzinin rəisi Madona Qoqitidze "Gürcüstan təhsil
sistemində islahatlar", Çakvin kənd 1 nömrəli orta
məktəbin müəllimi Nana Modebadze "Orta təhsil
islahatları bizim məktəbimizdə necə həyata keçirilir"
mövzusunda çıxışlar ediblər. Konfransın sonunda
Azərbaycan Təhsil Şurası ilə Gürcüstan Respublikası
Kobuleti şəhər Bələdiyyəsi arasında əməkdaşlıq haqqında
memorandum imzalanıb, iştirakçılara sertifikatlar təqdim
olunub.
Yusif ƏLİYEV,
"Azərbaycan müəllimi" |
