|
"Azərbaycan Respublikası Nazirlər Kabinetinin 2011-ci il
13 yanvar tarixli 5 nömrəli qərarı ilə təsdiq edilmiş
"Ümumtəhsil məktəbinin Nümunəvi Nizamnaməsi"ndə
dəyişikliklər edilməsi haqqında" Azərbaycan Respublikası
Nazirlər Kabinetinin 2014-cü il 30 oktyabr tarixli 362
nömrəli qərarının yerinə yetirilməsi ilə əlaqədar
ƏMR EDİRƏM:
1. Azərbaycan Respublikası Nazirlər Kabinetinin yuxarıda
qeyd olunan qərarı icra və rəhbərlik üçün qəbul edilsin.
2. Nəzərə alınsın ki:
2.1. Azərbaycan Respublikası Nazirlər Kabinetinin həmin
qərarı ilə "Ümumtəhsil məktəbinin Nümunəvi
Nizamnaməsi"ndə dəyişiklik edilərək bu sənədin 4.9 -
4.12-ci bəndləri aşağıdakı redaksiyada verilmişdir:
"4.9. Ümumtəhsil məktəbində dərs məşğələləri sentyabrın
15-də başlayıb iyunun 14-də başa çatır. Dərs ili iki
yarımilə bölünür:
4.9.1. birinci yarımil - 15 sentyabr - 26 yanvar;
4.9.2. ikinci yarımil - 1 fevral - 14 iyun.
4.10. Dərs ili ərzində aşağıdakı tətillər müəyyən edilir:
4.10.1. 5 gün payız tətili (16-20 noyabr);
4.10.2. 5 gün qış tətili (27-31 yanvar).
4.11. İbtidai siniflər üçün 5 günlük (1-5 may) əlavə yaz
tətili müəyyən edilir.
4.12. Yaranmış şəraitdən və vəziyyətdən asılı olaraq,
Azərbaycan Respublikası Təhsil Nazirliyinin əmrinə
əsasən respublikanın bütün ərazisində və yaxud bu və ya
digər ərazi vahidində dərs ilinin müddətində və tətil
günlərində dəyişikliklər edilə bilər."
2.2. Ümumtəhsil məktəblərində dərs ilinin müddətinin
uzadılması ilə əlaqədar tədris həftələrinin sayı 5
günlük iş rejimi tətbiq olunan məktəblərdə 34,4-ə (ibtidai
siniflərdə 33,4-ə), 6 günlük iş rejimi tətbiq
olunan məktəblərdə 34,8-ə çatdırılmışdır.
3. Tədris ilinin başlandığını və ümumi təhsil
müəssisələrinin tədris planlarının təsdiq olunub həyata
keçirildiyini nəzərə alaraq, "Ümumtəhsil məktəbinin
Nümunəvi Nizamnaməsi"ndə edilən dəyişikliklər
2015-2016-cı dərs ilindən tətbiq olunsun.
4. Naxçıvan MR Təhsil Nazirliyi, Bakı Şəhəri üzrə Təhsil
İdarəsi, Gəncə Şəhər Təhsil İdarəsi, rayon (şəhər)
təhsil şöbələri, Nazirlik tabeliyindəki ümumi təhsil
müəssisələrinin direktorları bu əmrin məzmununun
ümumtəhsil məktəblərinin pedaqoji kollektivlərinə
çatdırılmasını və valideynlərin bu barədə
məlumatlandırılması üçün müvafiq maarifləndirmə işləri
aparılmasını təmin etsinlər.
5. Məktəbəqədər və ümumi təhsil şöbəsi (A.Əhmədov)
ümumtəhsil məktəblərinin 2015-2016-cı dərs ili üçün
tədris planlarında bu dəyişikliklərin nəzərə alınmasını
təmin etsin.
6. Tədris resursları şöbəsi (F.Şahbazlı) qeyd olunan
dəyişiklikləri dərslik hazırlığı ilə bağlı məsələlərin
həllində nəzərə alsın.
7. İnformasiya şöbəsi (E.Əliyev) bu əmrin "Azərbaycan
müəllimi" qəzetində dərc olunmasını və Nazirliyin
internet saytında yerləşdirilməsini təmin etsin.
8. Əmrin icrasına nəzarət nazir müavini Ceyhun Bayramova
həvalə olunsun.
Mikayıl CABBAROV,
Azərbaycan Respublikasının təhsil naziri
24 noyabr 2014-cü il |
