|
 Söhbət
Arif Hüseynovdan gedəndə onu yaxından tanıyanlar hər
zaman bu fikri xüsusi vurğulayırlar: "Onun sənəti xalqa
yaxın, quruluş verdiyi rəqslər isə ruhu oxşayandır".
Yazımızın qəhrəmanı olan rəqs müəllimi Arif Hüseynovun
ömür payına milli rəqslərimizi yaşatmaq və onu
gənclərimizə düzgün şəkildə öyrətmək düşüb.
1941-ci il martın 17-də Bakıda anadan olan Arif
müəllimin rəqsə olan həvəsi onun gələcək həyatının
müəyyənləşməsində mühüm rol oynayıb. O, Bakı
Xoreoqrafiya Məktəbinin baletmeyster fakültəsini
bitirərək 1959-1966-cı illərdə Dövlət Mahnı və Rəqs
Ansamblında rəqqas, 1968-2006-cı illərdə isə İ.Əbilov
adına Mədəniyyət Evində baletmeyster işləyib. Əsrlər
boyu nəsillərdən-nəsillərə ötürülmüş milli rəqslərimizi
doğru-düzgün şəkildə gənclərimizə öyrətmək məqsədilə
işlədiyi İ.Əbilov adına Mədəniyyət Evinin nəzdində
1968-ci ildə yaratdığı "Könül" xalq milli rəqs ansamblı
öz fəaliyyəti dövründə Azərbaycanda rəqs sənətinin
inkişafına əvəzsiz töhfələrini verib. Vaxtilə 40 nəfər
həvəskardan ibarət təşkil olunan ansambl uğurlu
çıxışları ilə tez bir zamanda diqqəti özünə cəlb edə
bilib. Arif müəllimin yaratdığı rəqs ansamblı
respublikanın müxtəlif bölgələrində, hərbi hissələrdə
zəngin proqramlarla çıxış edib, bir sıra mühüm əhəmiyyət
kəsb edən tədbirlərin əvəzsiz iştirakçısı olub. Ansambl
Azərbaycan mədəniyyətinin inkişafındakı xidmətlərinə
görə fəxri fərmanlarla təltif olunub.
Ölkəmizdə kifayət qədər əldə etdiyi nailiyyətləri ilə
tanınan ansamblın respublikamızın hüdudlarından kənarda
da xoş sorağı gəlib. "Könül" ansamblı 1972-2003-cü
illərdə bir sıra xarici ölkələrdə keçirilən beynəlxalq
folklor, dostluq, rəqs festivallarında, həmçinin XII
Dünya gənclər festivalında (Rusiya), Bolqarıstan,
Rumıniya və Hollandiyada təşkil olunan "Azərbaycan
mədəniyyəti günləri"ndə və digər tədbirlərdə ölkəmizi
şərəflə təmsil edib.
Azərbaycan rəqslərinin inkişafı və təbliğində əvəzsiz
xidmətləri olan Arif Hüseynovun əməyi hər zaman yüksək
dəyərləndirilib. Belə ki, o, dəfələrlə SSRİ Mədəniyyət
Nazirliyinin, Azərbaycan Mədəniyyət Nazirliyinin (indiki
Mədəniyyət və Turizm Nazirliyi), Bakı Şəhər İcra
Hakimiyyətinin, Mədəniyyət İşçiləri Həmkarlar İttifaqı
Respublika Komitəsinin diplom, fəxri fərmanlarına və
"Əməkdar mədəniyyət işçisi" fəxri adına layiq görülüb,
"Əmək şücaətinə görə " medalı ilə təltif olunub.
Haqqında 1983-cü ildə çəkilmiş "Buta" adlı sənədli
televiziya filmi isə milli rəqslərimizin yorulmaz
təbliğatçısı, onu yeniyetmə və gənclərimizə sevə-sevə
öyrədən Arif Hüseynovun uzunillik səmərəli
fəaliyyətinə verilən dəyərin bariz nümunəsidir.
Ömrünün yarıdan çoxunu sevimli peşəsi ilə məşğul olan
ustad rəqqasın peşəkarlığından, təcrübəsindən kino
mütəxəssisləri də faydalanıb. O,"Firuzə", "Babək",
"Qorxma, mən səninləyəm", "Bəyin oğurlanması" bədii
filmlərindəki rəqslərə quruluş verib.
Öz sənətinin vurğunu olan, yorulmaq nə olduğunu
bilməyən, "yorğunluğumu rəqslə çıxarıram" - deyən
sənətkar bu gün də eyni şövqlə, eyni həvəslə
gənclərimizə xalqımızın qədim və zəngin rəqslərini
öyrədir.
Samirə KƏRİMOVA,
"Azərbaycan müəllimi" |
