|
Fidan RÜSTƏMZADƏ,
Heydər Əliyev adına liseyin XI "b" sinif şagirdi
 Uşaqların
III ümumrespublika forumu bu il noyabrın 17-də Bakı
şəhərində keçirildi. Forumda Azərbaycanın bütün şəhər və
rayonlarından 350 nəfərə yaxın uşaq, o cümlədən xüsusi
istedadı olan, sağlamlıq imkanları məhdud, digər
millətlərdən olan, valideyn himayəsindən məhrum olmuş
uşaqlar nümayəndə qismində iştirak etdilər.
Forum həm də bir uşağın onu düşündürən, narahat edən
məsələləri dilə gətirməsi, problemlərin birgə həlli
yollarını araşdırması məqsədi ilə keçirildi. Dövlətimiz
tərəfindən həyata keçirilən belə forumlar uşaqların öz
bacarıqlarını nümayiş etdirməsi üçün bir vasitəyə
çevrilib. Həmçinin forum biz uşaqların ictimai
fəallığının artırılmasında, iştirak hüququnun təmin
edilməsində və liderlik keyfiyyətlərinin formalaşmasında
mühüm əhəmiyyətə malikdir.
Forumda uşaqları daha çox maraqlandıran 7 mövzu seçildi
və hər mövzuya uyğun qruplar təyin olundu. Mən "Ətraf
mühitin mühafizəsi və sağlam həyat tərzi" əsasında
yaradılmış qrupun rəhbəri idim. Biz işçi qrupumuz ilə
birgə bizə verilən 2 saat ərzində çox aktiv müzakirələr
apardıq, maraqlı fikirlər və təkliflər öyrəndik. Yekunda
uşaqların və ekspertlərin fikirləri əsasında təqdimat
hazırladıq. Həmin təqdimatı tədbir iştirakçıları və
uşaqlara təqdim etdik. Ümidvaram ki, mövcud problemlərin
həlli yolunda bizim də fikirlərimiz nəzərə alınacaq.
Nəhayət, mən belə fikirləşirəm ki, bu cür forumların
keçirilməsi dövlətin biz uşaqlara və gənclərə göstərdiyi
diqqətin bariz təzahürüdür. |
