|
Rayon təhsil şöbəsindən redaksiyaya verilən
məlumatda deyilir ki, rayonun ərazisində məcburi
köçkünlərin məskunlaşdığı Xocavənd qəsəbəsində
"Uşaqların hüquqlarını qoruyaq" mövzusunda tədbir
keçirilib. Məktəblilərin iştirakı ilə keçirilən tədbirdə
ölkəmizdə uşaqlara göstərilən dövlət qayğısından,
onların sağlam həyat tərzi və hərtərəfli inkişafı üçün
görülən işlərdən danışılıb. Bildirilib ki, uşaq
hüquqlarının təşviqi ilə əlaqədar həm BMT-nin Uşaq
Hüquqları Komitəsinin verdiyi tövsiyələrin yerinə
yetirilməsi, həm də BMT Baş Məclisinin uşaqlara həsr
olunmuş 27-ci xüsusi sessiyasının yekun sənədi olan
"Uşaqlara yararlı dünya" Bəyannaməsinin və Fəaliyyət
Planının həyata keçirilməsi istiqamətində Azərbaycan
hökuməti tərəfindən geniş iş aparılır. Həmçinin
uşaqlarla bağlı təhsil, səhiyyə və digər sosial
məsələlər sahəsində UNİCEF ilə yaxından əməkdaşlıq
həyata keçirilir. Çıxışlarda orta məktəblərdə uşaq
hüquqları ilə bağlı maarifləndirmə tədbirlərinin
mütəmadi keçirilməsinin vacibliyi vurğulanıb.
Sonda uşaq hüquqları ilə bağlı film nümayiş etdirilib.
Şakir CƏFƏROV,
"Azərbaycan müəllimi" |
