|
Rayon təhsil şöbəsindən bildiriblər ki, Fövqəladə
Hallar Nazirliyinin Qarabağ Regional Mərkəzi rayonun
ərazisində məcburi köçkünlər üçün salınmış Qayıdış
qəsəbəsindəki 4 nömrəli tam orta məktəbdə "Fövqəladə
hallar zamanı davranış qaydaları" mövzusunda
maarifləndirici tədbir keçirib. Rayon təhsil şöbəsinin
və FHN-in yerli qurumlarının nümayəndələrinin, məktəbin
müəllim-şagird kollektivinin və texniki işçilərinin
iştirak etdikləri tədbirdə zəlzələ hadisəsi, sel və
daşqın təhlükələri barədə ətraflı məlumat verilib.
Mərkəzin əməkdaşlarının "Fövqəladə halların növləri",
"Elektrik cihazlarından istifadə zamanı təhlükəsizlik
qaydaları", "101 və 112 xidmətinə müraciət qaydaları"
mövzularında məruzələri dinlənilib. İştirakçılara
məktəblərdə fövqəladə hallar zamanı düzgün davranış
qaydaları izah olunub.
Tədbirdə FHN tərəfindən hazırlanan "Qaz cihazlarından
istifadə zamanı təhlükəsizlik qaydaları" adlı videoçarx
nümayiş etdirilib, mövzu ilə bağlı şagirdlərə broşürlər
paylanıb, iştirakçıların sualları cavablandırılıb.
Sonra təhsil müəssisəsinin rəhbərliyinə məktəb
binalarının təxliyə planlarının mərtəbələr üzrə
qaydalara əməl etməklə düzgün hazırlanmasına, yanğın və
texniki təhlükəsizlik qaydalarının tələblərinə riayət
olunmasına, əsas və ehtiyat çıxış qapılarının,
zirzəmilərin daim istifadəyə yararlı vəziyyətdə
saxlanılmasına, yararsız vəziyyətdə olan elektrik naqil
və avadanlığının yenilənməsinə dair bir sıra tövsiyələr
verilib. |
