|
Avropa universitetlərində təhsil almaq hər zaman prestij
hesab olunub. "Euromag" jurnalı Avropada təhsil
haqlarına aydınlıq gətirmək istəyib. "İnvestisiya üçün
ən yaxşı obyekt insandır" fəlsəfəsini əsas götürən
tədqiqatçılar hesab edirlər ki, keyfiyyətli təhsilə
qoyulan pullar müasir dünyada bir çox qapıları açır.
Tədqiqatçılar Avropada əsasən 3 ölkədə - Böyük
Britaniya, Rusiya və İspaniyada təhsil haqlarını
müqayisə ediblər. Təhsil haqlarına zəruri yaşayış
məsrəfləri və gündəlik xərcləri də əlavə etsək, Böyük
Britaniya ali məktəblərinin verdiyi diplomu tam mənada
"qızıl" hesab etmək olar. Böyük Britaniyada illik
təhsil haqları 22670 avro təşkil edir. Bu məbləğdən
14840 avro bilavasitə təhsilə, 7830 avro isə yaşayış
ehtiyaclarına sərf olunur. Təhsil haqlarının baha olduğu
ikinci ölkə Rusiyadır. Rusiyada illik təhsil haqqı 7260
avro təşkil edir. Bu ölkədə yaşayış xərcləri təhsil
haqlarından 2 dəfə bahadır. Rusiyada 2410 avro təhsil,
4850 avro isə yaşayış məsrəfləri təşkil edir. Avropada
təhsil haqlarının baha olduğu 3-cü ölkə İspaniyadır. Bu
ölkədə illik təhsil haqları 5390 avrodur. İspaniyada
yaşamaq əcnəbi tələbəyə təhsil haqqından baha başa
gəlir. Orta təhsil xərcləri illik 770 avro, yaşayış və
digər xərclər 4620 dollar təşkil edir. Adıçəkilən
ölkələrdən başqa reytinq cədvəlinə əcnəbi tələbələrin
böyük üstünlük verdiyi Almaniya da düşüb. Bu ölkədə
illik təhsil 4835 avro təşkil edir. Digər ölkələrdən
fərqli olaraq Almaniyada tələbələr təhsilə ən az - 490
avro xərcləyirlər. Yaşayış və digər ehtiyaclar üçün
məsrəflər isə 4345 avro təşkil edir. |
