|
 Bakının
bütün ümumtəhsil məktəblərində XI sinif şagirdləri üçün
müstəqil Azərbaycan dövlətinin qurucusu və memarı, ulu
öndər Heydər Əliyevin irsinin öyrənilməsi ilə bağlı
dərslərin keçirilməsinə başlanılıb. Bakı Şəhəri üzrə
Təhsil İdarəsinin təşkilatçılığı ilə təşkil olunan
dərslər mayın 4-dək davam edəcəkdir. İlk belə dərs
noyabrın 18-də 276 nömrəli tam orta məktəbdə təşkil
olunub. "Heydər Əliyev irsinin öyrənilməsi" mövzusunda
keçirilən dərsdə adıçəkilən təhsil ocağının şagirdləri
ilə yanaşı, paytaxtın 30, 284, 297, 298 və 299 nömrəli
məktəblərinin şagirdləri də iştirak ediblər.
Açılışda Bakı Şəhəri üzrə Təhsil İdarəsinin ümumi
təhsil sektorunun məsləhətçisi Tural Mirzəliyev
ümummilli liderimiz haqqında dərslərin keçirilməsinin
əhəmiyyəti barədə söz açaraq yaxın tariximizin
öyrənilməsi baxımından belə dərslərin zəruriliyini
vurğulayıb. Məlumat üçün bildirib ki, ümummilli lider
Heydər Əliyevin həyat və fəaliyyəti ilə bağlı müxtəlif
mövzuları əhatə edəcək dərslər Bakı şəhəri ərazisində
fəaliyyət göstərən 470 ümumtəhsil məktəbinin (məcburi
köçkün məktəbləri də daxil olmaqla) ümumilikdə 22453 XI
sinif şagirdinə keçiləcək. Bu dərslərin tədrisi ilə
150-dən çox müəllim məşğul olacaq.
Dərslərin təşkilində əsas məqsəd ulu öndər Heydər
Əliyevin yüksək ideyalarının, ölkəmizin dövlət
quruculuğu prosesində bu dahi şəxsiyyətin rolunun və
xidmətlərinin öyrənilməsi, bütün bunların gənc nəsillərə
çatdırılmasından ibarətdir. Həmçinin şagirdlərin
potensial imkanlarının üzə çıxarılması baxımından mühüm
əhəmiyyət kəsb edən bu dərslər onların milli mənəvi
dəyərlərə malik, sağlam əqidəli, vətənpərvər, müasir
dünyagörüşlü şəxsiyyət kimi formalaşmasına və yetkin
vətəndaş kimi müstəqil həyata hazırlanmasına xidmət edir.
Sonra Bakıdakı 284 nömrəli tam orta məktəbin tarix
müəllimi Mehriban Mahmudova "Təhsil, mədəniyyət və elm"
mövzusunda geniş təqdimatla çıxış edib. Mehriban
müəllim çıxışında əbədiyaşar lider Heydər Əliyevin hamı
üçün örnək olan zəngin həyat yolu və dövlətçilik
fəaliyyətindən, doğma Vətən, xalq qarşısındakı müstəsna
xidmətlərindən bəhs edib.
Ulu öndər Heydər Əliyevin bütün sahələrə, o cümlədən elm
və təhsilin, mədəniyyətin inkişafına daim böyük önəm
verdiyini bildirən məruzəçi bu dahi şəxsiyyətin ölməz
ideyalarının əhəmiyyətini vurğulayıb.
Məruzə və mövzu ilə bağlı hazırlanmış slaydlar sagirdlər
tərəfindən maraqla qarşılanıb.
Samirə KƏRİMOVA,
"Azərbaycan müəllimi" |
