|
 Noyabrın
17-də Sumqayıt Dövlət Universitetində (SDU) Tələbə
Gənclər Təşkilatı, Azərbaycan Tələbə Gənclər
Təşkilatları İttifaqının və Azərbaycan Televiziyasının "Müasir
Azərbaycan Gənci" verilişinin aparıcısının iştirakı ilə
Milli Dirçəliş Günü və Beynəlxalq Tələbə Gününə həsr
olunmuş tədbir keçirilib.
Öncə tədbir iştirakçıları ulu öndər Heydər Əliyevin
universitetin foyesində qoyulmuş büstü önünə gül
dəstələri düzərək ümummilli liderə dərin ehtiramlarını
bildiriblər.
Tədbirdə universitetin humanitar məsələlər üzrə
prorektoru, dosent Nizami Namazov iştirakçıları rektor
Elxan Hüseynovun adından təbrik edib.
Prorektor təhsil və savadlılıq məsələlərinə toxunaraq
bildirib ki, cənab Prezident İlham Əliyevin apardığı
daxili və xarici siyasətdə təhsil əsas prioritetlərdən
birinə çevrilib. Yalnız təhsilli, savadlı insanların
həm ölkəsini, həm də özünü inkişaf etdirə bildiyini
deyən N.Namazov bu səbəbdən də dövlətimizin gənclərin
xaricdə təhsil almalarına böyük önəm verdiyini bildirib.
Son dövrlər universitetdə aparılan islahatlar
nəticəsində dünyanın aparıcı təhsil ocaqları ilə
əlaqələrin daha da genişləndiyini diqqətə çatdırıb.
Vurğulanıb ki, bu gün Azərbaycanda gənclərin liderlik
bacarıqlarının inkişafı üçün hərtərəfli şərait
yaradılır. Belə ki, Prezident İlham Əliyev tərəfindən
imzalanmış "Azərbaycan gəncliyi 2011-2015-ci illərdə"
Dövlət Proqramına əsasən regionlarda gənclər evlərinin,
gənclər mərkəzlərinin yaradılması, gənclər üçün
intellektual klubların təsis olunması, gənclərin
inkişafına yönəlmiş bir sıra layihələrin həyata
keçirilməsi dövlətimizin gənclərə olan diqqəti və
qayğısının parlaq nümunəsidir.
Tədbirdə Azərbaycan Tələbə Gənclər Təşkilatları
İttifaqının sədri Şahin İsmayılov çıxış edərək
universitetin professor-müəllim və tələbə heyətini hər
iki bayram münasibətilə təbrik edib. Sumqayıt Dövlət
Universiteti Tələbə Gənclər Təşkilatının sədri Şənlik
Əliyev də daxil olmaqla, şuranın 13 üzvünə Azərbaycan
Tələbə Gənclər Təşkilatı İttifaqının diplomlarını və
müxtəlif hədiyyələrini təqdim edib.
Sumqayıt Dövlət Universiteti Tələbə Gənclər Təşkilatının
sədri Şənlik Əliyev təmsil etdiyi təşkilat adından
universitetin rəhbərliyinə və tədbirin təşkilatçılarına
təşəkkürünü bildirib.
Bayram tədbiri universitetin "Səma" ansamblının və dəvət
olunmuş ayrı-ayrı müğənnilərin maraqlı və rəngarəng
çıxışları ilə başa çatıb.
Nazxanım CƏLİLLİ,
SDU-nun Mətbuat xidmətinin rəhbəri |
