|
 Noyabrın
14-15-də Bakı Pedaqoji Kadrların İxtisasartırma və
Yenidənhazırlanma İnstitutunda 2014-2015-ci tədris ili
üzrə yenidənhazırlanma fakültəsinə "Azərbaycan dili və
ədəbiyyatı", "riyaziyyat və informatika", "təhsildə
sosial-psixoloji xidmət", "məktəbəqədər təlim və
tərbiyə" ixtisasları üzrə qəbulla əlaqədar müsahibə
keçirilib. Müsahibədən öncə keçirilən görüşdə institutun
rektoru, professor Asəf Zamanov adıçəkilən ixtisaslar
üzrə ali təhsilin əhəmiyyətini vurğulayaraq bildirib ki,
müasir təhsilin uğurları daim dəyişən şəraitə çevik
uyğunlaşma qabiliyyəti ilə müəyyənləşdirilir. Bu
baxımdan yenidənhazırlanma yolu ilə mütəxəssis hazırlığı
"Azərbaycan Respublikasında təhsilin inkişafı üzrə
Dövlət Strategiyası"nda öz əksini tapıb. İnstitutda bu
sahəyə xüsusi diqqət yetirildiyini söyləyən A.Zamanov
müsahibə prosesinin obyektiv və şəffaflığının təmini
üçün şərait yaradıldığını diqqətə çatdırib, müsahibəyə
qatılan şəxslərə, həmçinin komissiya üzvlərinə uğurlar
arzulayıb.
Təhsil Nazirliyinin məsul işçisi Eşqi Bağırov da
müsahibə prosesində iştirak edib.
Müsahibədə müsbət nəticələr göstərmiş və müvafiq
ixtisaslar üzrə Yenidənhazırlanma fakültəsinə qəbul
olunmuş tələbələr, onların valideynləri, institutun
professor-müəllim heyəti və KİV nümayəndələri ilə
noyabrın 17-də institutda görüş keçirilib. Tədbiri giriş
sözü ilə açan BPKİYİ-nin rektoru, professor Asəf Zamanov
17 noyabrın Azərbaycan xalqı üçün müqəddəs bir gün
olduğunu diqqətə çatdıraraq Milli Dirçəliş Gününün
tarixi əhəmiyyətindən söz açıb. Bildirib ki, bu gün
dünyaya sürətlə inteqrasiya edən müstəqil Azərbaycan
dövlətinin, bütün istiqamətlərdə həyata keçirilən uğurlu
islahatların təməli məhz ümummilli lider Heydər Əliyevin
adı ilə bağlıdır.
Rektor dahi lider Heydər Əliyevin daxili və xarici
siyasətini uğurla davam etdirən Prezident İlham Əliyevin
rəhbərliyi ilə 2011-ci ildə Azərbaycan Respublikasının
ilk dəfə BMT Təhlükəsizlik Şurasının üzvü seçilməsini,
2013-cü ildə dünyanın "kosmik ölkələri" sırasına,
BMT-nin 2010-cu il üzrə insan inkişafı hesabatında
göstərildiyi kimi "orta insan inkişafı" qrupundan
"yüksək insan inkişafı" qrupuna daxil olmasını, Dünya
İqtisadi Forumunun hesabatında iqtisadi rəqabətlilik
qabiliyyətinə görə Azərbaycanın 146 ölkə sırasında 38-ci
yerdə həm region, həm də MDB üzvü olan ölkələrdən öndə
olmasını xüsusi vurğulayıb. Təhsilin maddi-texniki
bazasının gücləndirilməsi, həmçinin insan resurslarının
formalaşdırılması istiqamətində görülən işlərdən söz
açan rektor Azərbaycan Respublikası Prezidentinin 24
oktyabr 2013-cü il tarixli Sərəncamı ilə təsdiq edilmiş
"Azərbaycan Respublikasında təhsilin inkişafı üzrə
Dövlət Strategiyası"nın əhəmiyyətini vurğulayıb.
A.Zamanov çıxışında neft kapitalının insan kapitalına
çevrilməsi istiqamətində görülən işlərdən, o cümlədən,
dövlət proqramı əsasında dünyanın aparıcı
universitetlərində təhsil almaq üçün göndərilən
gənclərin Azərbaycanın intellektual potensialının
formalaşması üçün əhəmiyyətindən də bəhs edib. Təhsilin
və elmin maddi-texniki bazasının möhkəmlənməsində, insan
resurslarının inkişafında həm dövlətimizin, həm də
Heydər Əliyev Fondunun fəaliyyətindən söz açaraq,
qazanılan bütün uğurların fövqündə müstəqilliyimizin
durduğunu əsaslandırıb. 23 ildə Azərbaycanın əsrə
bərabər inkişaf yolu keçdiyini diqqətə çatdırıb.
Natiq son altı ildə BPKİYİ-nin yüksək ixtisaslı kadr
potensialının formalaşdığını, dünyanın 50-dən çox ali
məktəbi və elmi-tədqiqat institutu ilə səmərəli
əməkdaşlığını, professor-müəllim heyəti tərəfindən
respublikamızda və xaricdə 900-ə qədər elmi əsərin (monoqrafiya,
dərslik, dərs vəsaiti, elmi məqalə və s.) nəşr
edildiyini qeyd edib.
Rektor çıxışının sonunda institutun tələbəsi adını
qazanan gəncləri təbrik edib, onlara keyfiyyətli təhsil
verilməsi üçün şərait yaradıldığını bildirərək yüksək
təhsil uğurları arzulayıb.
Digər çıxış edənlər də BPKİYİ-nin Yenidənhazırlanma
fakültəsinə qəbul olunmuş tələbələrə ürək sözlərini
bildiriblər.
Rəşad RAMAZANOĞLU,
"Azərbaycan müəllimi" |
