|
 Noyabrın
12-də Heydər Əliyev Mərkəzində ali təhsil
müəssisələrinin tələbələri arasında "Heydər Əliyev və
Azərbaycan tarixi" adlı ümumrespublika bilik yarışı
keçirilib. Əvvəlcə ümummilli lider Heydər Əliyevin
gənclərlə bağlı nitqinin videolenti nümayiş etdirilib.
Heydər Əliyev Mərkəzi və Təhsil Nazirliyi ilə birgə
reallaşdırılan layihənin məqsədi Azərbaycan xalqının
ümummilli lideri Heydər Əliyevin həyat və fəaliyyətinin
dərindən öyrənilməsi, ulu öndərin irsinin yaşadılması və
gənclər arasında təbliğindən ibarətdir. Yarışda ölkənin
ali təhsil müəssisələrində bakalavr və magistr
pillələri üzrə əyani təhsil alan tələbələrdən ibarət 44
komanda olmaqla 264 tələbə iştirak edib. Hər ali məktəb
bir komanda ilə təmsil olunub.
Daha sonra tədbiri giriş sözü ilə açan Heydər Əliyev
Mərkəzinin direktorunun birinci müavini Adil Kərimli
qeyd edib ki, bu bilik yarışı formatına və məzmununa
görə fərqlənir. O bildirib ki, yarış həm ulu öndər
Heydər Əliyevin fəaliyyətini, həm də Azərbaycanın əsas
tarixi hadisələrini əhatə edir: "Ulu öndər tarix
yaratmış şəxsiyyətlərdəndir və həqiqətən də diqqət
yetirsəniz, Azərbaycan tarixinin ən mühüm hadisələri
məhz ulu öndərin adı ilə bağlıdır. Azərbaycan və Heydər
Əliyev adları ayrılmazdır".
Münsiflər heyətinin üzvləri Heydər Əliyev Mərkəzinin
Heydər Əliyev irsinin tədqiqi və elmi araşdırmalar
departamentinin direktoru Məhəbbət Mehdiyeva, təhsil
nazirinin müşaviri Hüseyn Əliyev, AMEA-nın Tarix
İnstitutunun "Əliyevşünaslıq" şöbəsinin müdiri Ədalət
Qasımov da bu yarışın Azərbaycan xalqının ümummilli
lideri Heydər Əliyevin həyat və fəaliyyətinin dərindən
öyrənilməsi istiqamətində mühüm addım olduğunu
vurğulayıblar.
Sonra tələbələrin yarışa hazırlığını əks etdirən qısa
videoçarx nümayiş etdirilib. Qeyd edək ki, yarış
ərəfəsində bütün komandalar Heydər Əliyev Mərkəzini
ziyarət edərək burada fəaliyyət göstərən Heydər Əliyev
Muzeyi ilə tanış olub, ümummilli liderin həyat və
fəaliyyətinə dair məlumatlar, foto və videomateriallar
əsasında araşdırma aparıblar.
Üç turdan ibarət və gərgin mübarizə şəraitində keçən
yarışın qalibi 35 xal qazanan Bakı Slavyan Universiteti
olub. Milli Təhlükəsizlik Nazirliyinin Heydər Əliyev
adına Akademiyası 32 xalla II, Lənkəran Dövlət
Universiteti isə 31 xalla III yeri tutub.
Sonda qalib gələn komandalar mükafatlandırılıb.
Bütün iştirakçı komandalara isə sertifikatlar verilib.
Qalib gələn və iştirakçı komandaların nümayəndələri
xatirə şəkli çəkdiriblər.
Rəşad RAMAZANOĞLU,
"Azərbaycan müəllimi" |
