|
Rusiya Rektorlar Birliyinin qurultayı keçirilib
 M.V.Lomonosov
adına Moskva Dövlət Universitetində Rusiya Rektorlar
Birliyinin X qurultayı keçirilib. "Uçitelskaya
qazeta"nın məlumatına əsasən, tədbirdə Rusiya
prezidenti Vladimir Putin də iştirak edib. Qurultayda
ali təhsil sisteminin inkişaf məsələləri,
universitetlərin maddi-texniki bazasının
gücləndirilməsi, təhsilin keyfiyyətinin artırılması
üzrə tədbirlər, eləcə də ali məktəbdə elmin rolunun
möhkəmləndirilməsi diqqət mərkəzində olub. Rektorların
sayca X yubiley tədbirində iştirak etməkdən məmnunluq
duyduğunu ifadə edən V.Putin qurultayda praktik olaraq
ölkənin bütün ali məktəb rəhbərliklərinin təmsil
olunduğunu, bu sistemdə 300 min insanın çalışdığını, 5,5
milyon tələbənin təhsil aldığını bildirib. Dövlət
başçısı öz çıxışında qeyd edib ki, ali təhsil sistemi
ölkənin güclü intellektual resursu olaraq qalmaqdadır,
bu sistem yeni biliklər yaradır. Son illər milli
universitetlərin zamanın tələblərinə uyğun inkişafı üçün
çox işlər görülüb, onlar daha çox
rəqabətqabiliyyətlidirlər. "Bizim ali məktəb güclü
olmalıdır, əsl, müasir, layiqli təhsil verməlidir.
Əlbəttə ki, yüksək səviyyəli bilikləri heç də istənilən
şəxs mənimsəyə bilmir. Universitetlər açıqdan-açığa
qeyri-qənaətbəxş biliklər nümayiş etdirən abituriyent
qəbul edir, bu isə çox sayda suallar doğurur.
Abituriyent uğrunda, eləcə də maliyyələşdirmə uğrunda bu
cür yarışma, açıq demək lazımdır, dərhal ali təhsil
müəssisəsini hörmətdən salır, dəyərləri silir, ali
məktəbin nüfuzunu, prestijini aşağı salır. Sonda biz
hansı keyfiyyətli mütəxəssis alırıq? Aydındır ki, yaxşı
nəticələr gözləməyə dəyməz. Ali məktəbə orada oxumağa
layiq olanlar daxil olmalıdırlar. Bu istər büdcə
yerlərinə, istərsə də pullu əsasda qəbul olunanlara
aiddir". Prezident qeyd edib ki, əməkhaqlarının artımı,
ali məktəblərin maddi-texniki bazasının
yaxşılaşdırılması ali məktəbin inkişafı, yeniləşməsinin
üsullarıdır. Dövlət başçısı bildirib ki, ali təhsilin,
onun tədris proqramlarının məzmununa iradlar çoxdur. Heç
də hər bir ali məktəb müasircəsinə işləməyə, öyrətməyə
hazır deyil. Elə etmək lazımdır ki, məzunlar təkcə
diplomlar deyil, həm də ali məktəbi bitirdikdən sonra
praktik fəaliyyətdə istifadə edəcəkləri biliklər, peşə
vərdişləri alsınlar. Daha sonra çıxış edən MDU-nun
rektoru V.Sadovniçi qurultayın ölkə həyatı, təhsil
ictimaiyyəti üçün xüsusi əhəmiyyətini vurğulayaraq
tədbirdə praktik olaraq Rusiyanın bütün ali məktəb
rektorlarının, bundan əlavə Azərbaycan, Belarus,
Qazaxıstan, Tacikistan və b. ölkələrdən olan
nümayəndələrin də iştirak etdiyini bildirib. O, Rusiya
Rektorlar Birliyi tərəfindən işlənib hazırlanmış "Yeni
Rusiya üçün yeni universitetlər" təhsil doktrinasının
təhsilin keyfiyyəti, ali təhsil sistemində elmin
inkişafı, yeni iqtisadi reallıqlar şəraitində
universitetlərin inkişafı, təhsil və tərbiyə, humanitar
biliklərin rolu, istedadların axtarışı və onların
dəstəklənməsi, dünya təhsil məkanında Rusiya ali
məktəblərinin yeri kimi 6 mühüm istiqaməti əhatə
etdiyini qeyd edib. V.Sadovniçi universitetlər nəzdində
istedadlı uşaqlar üçün xüsusi internat-məktəblərin
yaradılması təklifi ilə çıxış edib. O, mühəndislərin 6,
müəllimlərin 5 il ərzində hazırlanması təcrübəsinin
zəruriliyini bildirib. |
|
Ukrayna 12 illik təhsil sisteminə qayıdır
 Ukraynanın
Təhsil və Elm Nazirliyi məktəbləri 12 illik
təhsil formatına qaytarmağı təklif edib.
Nazirliyin mətbuat xidmətinin məlumatında
bildirilir ki, bu barədə Ukraynanın 2015-2025-ci
illər üzrə təhsilin inkişafı konsepsiyası
layihəsində qeyd olunub. Aşağı sinifləri
bitirdikdən sonra məktəblilərin biliklərini
yoxlamaq üçün test imtahanları keçiriləcək.
Bundan əlavə, testlər orta siniflərdən yuxarı
siniflərə keçid mərhələsində də keçiriləcək,
bu prosedur nəticəsində məktəblinin harada -
dar çərçivədə peşə təhsilini davam etdirməsi və
ya ali məktəblərə qəbul imtahanlarına
hazırlaşmağa göndərilməsi müəyyən olunacaq.
Bununla yanaşı, yuxarı siniflərin ayrı-ayrı
təhsil müəssisələrinə yerləşdirilməsi
planlaşdırılır. Sənəddə 12 illik təhsilə
keçidin tətbiq olunacağı müvəqqəti çərçivə
göstərilmir. Həmçinin əsas formatın
dəyişdirilməsi səbəbi də sənəddə əksini
tapmayıb. 2015-2025-ci illər üzrə təhsilin
inkişafı konsepsiyasının layihəsi 2014-cü ilin
iyulunda Təhsil və Elm Nazirliyində yaradılmış
ekspert qrupu tərəfindən hazırlanıb.
Xatırladaq ki, Ukraynada 12 illik təhsil
2002-ci ildə tətbiq olunub, 2010-cu ilin
iyulunda isə parlament 11 illik təhsilə qayıtmaq
barədə qərar verib. |
|
Pakistanlı şagird məktəblərin təmiri və
bərpasına yardım edib
 Pakistan
məktəblisi, sülh üzrə Nobel mükafatçısı 17 yaşlı
Malala Yusifzay bu yaxınlarda Stokholmda
"Ümumdünya uşaq mükafatı"na ("Worlds Children
Prize") layiq görülüb. O, dəyəri 50 min dollar
olan mükafatı Qəzza zolağında münaqişə zamanı
sıradan çıxmış məktəblərin təmiri və bərpasına
sərf edəcəyini bildirib.
"Bu gün mən elan etməyə şadam ki, ümumdünya uşaq
mükafatı şəklində mənə verilən pullar yardım
məqsədilə Qəzzadakı şagirdlərə və məktəblərə
göndəriləcək", - deyə Malala bildirib. O
vurğulayıb ki, 50 min dolları fələstinlı
qaçqınlara yardım missiyasını həyata keçirən
BMT-nin Yaxın Şərq agentliyinin sərəncamına
göndərəcək. Bu gün Qəzza sektorunda əhalinin
yarıdan çoxu, 18 yaşdan aşağı, ilk növbədə,
keyfiyyətli təhsil ehtiyacı olan insanlardır.
Malalanın verdiyi pul Qəzzada 65 məktəbin
bərpasına sərf olunacaq.
Münaqişə zamanı bir sıra məktəb binası tamamilə
dağıdılıb. Təhsil müəssisələrinin çoxu məcburi
köçkünlər üçün sığınacaq kimi istifadə olunur.
Nəticədə tədris ili həmişəkindən təxminən üç
həftə sonra başlayıb. |
