|
Noyabrın 1-də Azərbaycan Texniki Universitetində (AzTU)
Layihələrin idarə olunması və İnnovasiyalar Mərkəzinin
açılışı olub.
AzərTAc xəbər verir ki, tədbirdə AzTU-nun rektoru,
professor Havar Məmmədov mərkəzin açılışının 1 noyabr -
Dünya Layihə Menecerləri Gününə təsadüf etdiyini
bildirib. Rektor qeyd edib ki, Azərbaycanda bu gün
AzTU-nun nəzdində yeni mərkəzin istifadəyə verilməsi ilə
əlamətdar olacaq, universitet üçün, eləcə də
respublikamızın layihə menecerləri üçün sevindirici
hadisə kimi yadda qalacaqdır. O, toplaşanları həmin gün
münasibətilə təbrik edib.
H.Məmmədov Layihələrin İdarə Edilməsi Beynəlxalq
Assosiasiyası Azərbaycan nümayəndəliyinin (AzPMA) bu
mərkəzin yaradılmasında xüsusi təşəbbüskarlıq və
metodoloji dəstək göstərdiyini diqqətə çatdırıb.
Respublikamızda bu sahə üzrə mütəxəssislərə böyük
ehtiyac olduğunu söyləyən H.Məmmədov bildirib ki,
dünyada qloballaşma və virtuallaşma proseslərinin
getdiyi bir dövrdə Azərbaycanda ilk dəfə AzTU-da belə
bir mərkəzin açılması xüsusi əhəmiyyət daşıyır.
Gələcəkdə bu mərkəzdə irimiqyaslı birgə beynəlxalq
layihələrin həyata keçiriləcəyi qeyd olunub.
Açılış mərasimində AzPMA-nın prezidenti, professor İqbal
Babayev mərkəzin əsas fəaliyyət istiqamətləri və
məqsədləri barədə geniş məlumat verib. Bildirilib ki,
mərkəzin fəaliyyəti layihə menecmenti üzrə beynəlxalq
standartların ölkəmizdə tətbiqi və onun
metodologiyasının öyrənilməsi, tələbələrlə peşəkar
layihə menecerləri arasında təcrübə mübadiləsi məqsədilə
elmi körpünün yaradılması, gənc alim və mütəxəssislər
üçün layihə menecmenti üzrə elmi tədqiqat işlərinin
həyata keçirilməsinə şəraitin yaradılması ilə bağlıdır.
Tədbirdə AzPMA-nın standartlarına uyğun
sertifikatlaşdırma proqramını müvəffəqiyyətlə başa
vurmuş və imtahandan müsbət nəticə əldə etmiş yerli
mütəxəssislərə "Layihə meneceri" beynəlxalq dərəcəli
diplomlar təqdim olunub.
Mərkəzin fəaliyyətində ilk addım kimi burada
Azərbaycanın beynəlxalq dərəcəli sertifikatlaşdırılmış
layihə menecerləri və "Layihə menecerləri klubu"
üzvlərinin görüşü çərçivəsində "Gələcəyə baxış:
təşkilatın davamlı inkişafında layihə menecmentinin
rolu" mövzusunda seminar keçirilib. |
