|
 Noyabrın
5-də Bakıdakı "Avropa" otelində "Turin prosesi və
Azərbaycanda Milli İxtisas Çərçivəsinin həyata
keçirilməsinə dəstək" mövzusunda seminar keçirilib.
Seminar "Turin prosesi" və "Milli İxtisas Çərçivəsi"
olmaqla iki məsələyə həsr edilmişdi.
Seminarda Təhsil Nazirliyi, Əmək və Əhalinin Sosial
Müdafiəsi Nazirliyi, İqtisadiyyat və Sənaye Nazirliyi,
Milli Statistika Komitəsi, Dövlət Məşğulluq Xidməti,
Təhsil Problemləri İnstitutu, QHT, böyük müəssisələr,
araşdırma mərkəzlərinin nümayəndələri iştirak edirdilər.
Tədbirdə çıxış edən təhsil nazirinin müavini Firudin
Qurbanov iştirakçıları Təhsil Nazirliyi adından
salamlayaraq seminarın əhəmiyyətini yüksək
qiymətləndirdi.
Müstəqillik illərində ölkəmizin sürətlə inkişaf etdiyini
söyləyən nazir müavini bu inkişafı səciyyələndirən bir
sıra faktları diqqətə çatdırdı.
F.Qurbanov əsası ulu öndər Heydər Əliyev tərəfindən
qoyulmuş iqtisadi siyasətin ölkə Prezidenti İlham Əliyev
tərəfindən uğurla davam etdirildiyini vurğuladı. Qeyd
etdi ki, ölkəmizdə bütün sahələrdə aparılan islahatlar
təhsil sistemindən də yan keçməyib. Ölkəmizin 2020-ci
ilə qədər olan dövr üçün inkişaf konsepsiyasına əsasən
təhsilin inkişafı üzrə Dövlət Strategiyası qəbul olunub.
Yeni texnologiyaların sürətlə inkişaf etdiyi,
innovasiyaların istehsalata tətbiqinin geniş vüsət
aldığı müasir dövrdə insan kapitalının inkişaf
etdirilməsi, hazırlanan kadrların bilik və peşəkarlıq
səviyyəsinin yüksəldilməsi ən ümdə vəzifə kimi qarşıya
qoyulub.
Çıxışında Turin prosesinin məqsədlərinə də toxunan nazir
müavini Avropa İttifaqı Avropa Təlim Fondunun Turin
prosesinin nəticəsi olaraq Avropada aparılan təhsil
islahatlarının, orda olan müsbət nümunələrin digər
ölkələrdə tətbiqinin böyük əhəmiyyət kəsb etdiyini
bildirdi. Qeyd etdi ki, 2011-ci ildən Turin prosesinə
qoşulan ölkəmizdə bu ilin iyun ayında keçirilən
seminarda ilk peşə-ixtisas təhsilində vəziyyətin təhlil
edilməsi və müvafiq tövsiyələr hazırlanması qərara
alınmışdı. Ötən dövr ərzində hazırlanmış ilkin hesabat
bugünkü seminarda təqdim olunacaqdır.
Hazırda Azərbaycanda ilk peşə-ixtisas təhsili sistemində
islahatlar aparıldığını deyən nazir müavini bu
islahatların idarəetmə strukturunu, ixtisasların
formalaşdırılması və yeni ixtisasların öyrənilməsi ilə
bağlı sahələri əhatə etdiyini söylədi. İlk peşə-ixtisas
təhsili sahəsinin inkişafı ilə bağlı 2007-2012-ci illəri
əhatə edən dövlət proqramının artıq başa çatdığını
xatırladan F.Qurbanov Təhsil Nazirliyində 2020-ci ilədək
ilk peşə-ixtisas təhsilinin inkişafını nəzərdə tutan
yeni proqramın hazırlanması üzərində iş aparıldığını,
seminarda veriləcək tövsiyələrin proqramın hazırlanması
prosesində nəzərə alınacağını söylədi və seminarın
işinə uğurlar arzuladı.
Azərbaycan Respublikası İqtisadiyyat və Sənaye
Nazirliyinin şöbə müdiri Zaur Qasımov, Avropa
İttifaqının Azərbaycan üzrə nümayəndəliyinin proqram
meneceri Rza Zülfüqarzadə, Avropa Təlim Fondunun şöbə
müdiri Piter Qrinvud çıxış edərək seminarın mövzusu,
təmsil etdikləri qurumların bu istiqamətlərdəki
fəaliyyəti ilə bağlı fikirlərini bildirdilər.
Seminarda Təhsil Nazirliyinin mütəxəssisləri 2014-cü il
Turin prosesinin Azərbaycana dair hesabatının ilkin
versiyasını təqdim etdilər. Təqdimatdan sonra
müzakirələr aparıldı, peşə təhsili və təlimi sisteminin
inkişafı üçün tövsiyələr və prioritetlər irəli sürüldü.
Seminarın ikinci hissəsi Avropa Təlim Fondu
ekspertlərinin Milli İxtisas Çərçivəsinin tətbiqinə
göstərdiyi dəstəyin nəticələrinə həsr edildi. Bildirildi
ki, Azərbaycan Respublikasının Milli İxtisas
Çərçivəsinin tezliklə Nazirlər Kabineti tərəfindən
təsdiqlənməsi gözlənilir. Avropa İttifaqı 2015-ci ilin
ikinci yarısından etibarən təhsilə dəstək proqramı
çərçivəsində Azərbaycan Milli İxtisas Çərçivəsinin
tətbiqinə dəstək verməyi planlaşdırır.
Yusif ƏLİYEV,
"Azərbaycan müəllimi" |
