|
 Sentyabrın
20-dən 27-nə kimi Türkmənistanın Türkmənbaşı şəhərində 9
ölkənin nümayəndələrinin iştirakı ilə Müstəqil
Dövlətlər Birliyinə üzv ölkələr arasında "Məktəb idmanı"
Beynəlxalq festivalı keçirilib. Festivalda "Təhsil"
Respublika İdman Mərkəzi 23 nəfərdən ibarət nümayəndə
heyəti ilə təmsil olunub. Ölkəmiz həmin festivalın
proqramına daxil olan bütün idman növləri üzrə
(mini-futbol, çimərlik voleybolu, stolüstü tennis,
şahmat, basketbol) yarışlarda iştirak edib.
İdmançılarımız festivalda ilk dəfə iştirak etməsinə
baxmayaraq, bütün idman növləri üzrə əzmlə mübarizə
aparıblar.
"Təhsil" Respublika İdman Mərkəzinin direktoru Natiq
Lahıcovdan aldığımız məlumata görə, festivalın açılış
mərasimində Türkmənistanın idman naziri və festivalın
Təşkilat Komitəsinin sədri, fiqurlu konkisürmə üzrə
dəfələrlə olimpiya, dünya və Avropa çempionu, Rusiya
Federasiyası Dövlət Dumasının deputatı İrina Rodnina
çıxış edərək idmançıları festival münasibətilə təbrik
edib.
Tədbir çərçivəsində idmançılardan stolüstü tennis üzrə
şəxsi yarışlarda Mətin Həsənzadə III, Nəzakət Qarayeva
(məşqçi Əli Məmmədov) IV, şahmatda komanda hesabında
Tərlan Abdullayev, Zəhra Cəfərova (məşqçi Mahir Cəfərov)
V, çimərlik voleybollu yarışlarında Çingiz Ağazadə,
Süleyman Əhmədov (məşqçi Cəlil Baxtiozi) V, basketbol
üzrə Sali Al-Xuri, Marqarita İsmayılova, Fatimə
Kazımova, Valeriya Bespalko (məşqçi Teymur Qafarov) IV,
mini-futbol üzrə Ülvin Gülverdiyev, İlkin Mehdiyev,
Lətif Məhəmmədov, Yasin Quluzadə, Nəcəf Səfərov, Bəyqaz
Xəlilov, Şirin Şirinov (məşqçi Kamran Əliyev) V yeri
tutublar. Qeyd etmək lazımdır ki, yeganə olaraq
respublikamızın komanda heyəti vahid formada iştirak
edib. Çox yüksək səviyyədə keçirilən bu festival
məktəblilərdə xoş əhvali-ruhiyyə yaradıb. Yarış
ərəfəsində təşkil olunmuş səyahətlər, gəzintilər
idmançılarımız üçün də maraqlı olub.
Festivalın bağlanış mərasimi olduqca maraqlı keçib.
Azərbaycanın milli rəqslərindən biri olan "Tərəkəmə"
rəqsini komandamızın üzvü, səkkiz yaşlı Zəhra
Cəfərovanın milli geyimdə ifa etməsi alqışlarla
qarşılanıb. Respublikamızı təmsil edən idmançılar
Türkmənistandan xoş təəssüratlarla qayıdıblar. Festival
məktəbli idmançılar üçün dostluq körpüsü olub. Bu
idmançılar və məşqçilərlə apardığımız söhbətdə də aydın
ifadə olundu.
"Bizi
yüksək səviyyədə qarşıladılar"
"Təhsil" Respublika İdman Mərkəzinin İxtisaslaşdırılmış
Olimpiya Ehtiyatları Uşaq-Gənclər İdman Məktəbinin
stolüstü tennis üzrə məşqçisi Əli Məmmədov: "Sentyabrın
20-də Türkmənistanın Aşqabad şəhərinə getdik. Orada
bizi yüksək səviyyədə qarşıladılar. Bir gecə qaldıqdan
sonra səhərisi günü bizim nümayəndə heyətini Türkmənbaşı
şəhərinə apardılar. 12 ölkənin komandası ilə lazımi
səviyyədə mübarizə apardıq. Bizim bölmənin
idmançılarından Mətin Həsənzadə III və Nəzakət
Qarayeva IV yerləri tutdular.
"Nəticə çox ürəkaçan oldu"
İdman məktəbinin stolüstü tennis üzrə yetirməsi Mətin
Həsənzadə: "Türkmənistana yola düşməzdən əvvəl
yoldaşlarımızla həmişə müzakirə edərdik ki, biz yaxşı
nəticələrlə qayıtmalıyıq. Məşqçilərimiz də bizimlə
söhbətlərində deyirdilər ki, qabaqcıl yerləri
tutmalıyıq. Bizlərə həyəcanlı olmamağı və sərbəst
şəkildə oynamağı tövsiyə edirdilər.
Yarış haqqında onu deyə bilərəm ki, çox yaxşı, uğurlu
keçdi. Oyunlar nisbətən gərgin keçsə də, nəticə çox
ürəkaçan oldu. Bizim komanda heyəti vahid formada çıxış
edirdi. Mən həmin yarışda III yerə layiq görüldüm. Bu
səfərdən çox razı qaldım".
Rəşad RAMAZANOĞLU,
"Azərbaycan müəllimi" |
