|
 Rəhilə
Məhərrəmova 1996-cı ildə Fizuli rayonunun Aşağı
Yağlıvənd kəndində anadan olub. 2011-ci ildə B.Əzimov
adına Araz Yağlıvənd kənd orta məktəbinin IX , 2006-cı
ildə isə həmin kənddəki 7 illik uşaq musiqi məktəbinin V
sinfini əla qiymətlərlə bitirib. Elə həmin il Azərbaycan
Milli Konservatoriyası nəzdində Musiqi Kollecinin "Xalq
çalğı alətləri" şöbəsinə qəbul olunub. Hazırda o,
kollecin IV kursunda təhsil alır. Burada ixtisas
fənnindən Cəfər Qafarovun, muğam fənnindən isə Humay
Qədimovanın sinfində təhsilini davam etdirir.
R.Məhərrəmova 2012-ci ildə Rəşid Behbudov adına Mahnı
Teatrında kollecin yekun konsertində qızlardan ibarət
muğam üçlüyü tərkibində fərqlənib.
2013-cü ildə görkəmli xanəndə Xan Şuşinskinin 110 illik
yubileyi münasibəti ilə Xan Şuşinski Fondunun
təşkilatçılığı ilə keçirilən tələbə gənclər arasında
milli musiqi alətləri ifaçılarının respublika muğam
müsabiqəsində I yerə layiq görülüb. Azərbaycan Dövlət
Neft Akademiyasında təşkil olunmuş, Beynəlxalq Muğam
Mərkəzində Xan Şuşinski müsabiqəsinin yekununa, Bakı
Musiqi Akademiyasında, Azərbaycan Respublikası Təhsil
Nazirliyinin təşkilatçılığı ilə keçirilən konsertlərdə
uğurlu ifaları ilə tamaşaçılarda xoş ovqat yaradıb.
Söhbət əsnasında müəllimi Cəfər Qafarov yetirməsi
haqqında xoş sözlər söyləyərək bildirdi ki, artıq 3
ildir Rəhilə sinfimdə təhsil alır. Bu müddət ərzində
özünü tələbkar bir tələbə kimi göstərib. Kollecimizin
direktoru, əməkdar incəsənət xadimi, professor Nazim
Kazımov ona xüsusi diqqət göstərir. Nazim müəllim
kollecdə təhsil alan qız tar ifaçılarına qayğı ilə
yanaşır. Rəhiləni tanımaq üçün mütləq onun çalğısına
qulaq asmaq lazımdır. Onun özünün xüsusi repertuarı var.
İri formalı əsərlərdən S.Rüstəmovun, H.Xanməmmədovun,
T.Bakıxanovun, F.Babayevanın tar üçün yazılmış
"Konsert"ləri, S.Ələsgərovun tar üçün "Sonatina"sı və s.
virtuoz əsərlərdən C.Rossini "Vilhelm Tell" operasından
"Uvertüra", C.Cahangirov "Rondo", A.Bəbirov "Konsert
pyesi"və s., lirik əsərlərdən A.Məlikov "Məhəbbət
əfsanəsi" baletindən "Monoloq", V.Adıgözəlov "Laylay",
"Qərənfil", D.Şostakoviç "Romans" və s. qeyd etmək olar.
Azərbaycan və dünya bəstəkarlarının əsərləri onun
ifasında çox gözəl alınır. Eləcə də muğamları yüksək
məharətlə ifa edir. Sonuncu dəfə müsabiqədə uğurlu
çıxışı zamanı münsiflər heyətinin sədri, görkəmli
tarzən, respublikanın xalq artisti, professor Ramiz
Quliyev Rəhilə haqqında çox yüksək fikirlər şöyləyib:
-"Rəhilə, qızım, sənin digər qadın tar ifaçılarından
üstün cəhətin ondadır ki, sən klassik ifaya daha çox
meyillisən və bu səndə çox gözəl alınır".
Rəhilənın arzusu Milli Konservatoriyaya daxil olmaq,
milli alətimiz olan tarı dünyaya tanıtmaqdır. |
