|
 Əli
Həsən oğlu Məlikov 1998-ci ildə Bakıda anadan olub.
2007-ci ildə Rəşid Behbudov adına 2 nömrəli Onbirillik
Musiqi Məktəbinin tar ixtisası üzrə müəllim Kamil
Hüseynlinin sinfinə daxil olub. İlk günlərdən özünün
istedad və bacarığı ilə yaşıdlarından fərqlənib. O,
dəfələrlə məktəb və ümumşəhər tədbirlərində yüksək
göstəricilərə nail olub. Müxtəlif illərdə M.Maqomayev
adına Azərbaycan Dövlət Filarmoniyasında, R.Behbudov
adına Mahnı Teatrında, Kirxa konsert zalında solo
çıxışlar edib. 2010-cu ildə Azərbaycan Dövlət
Filarmoniyasında Azərbaycan Respublikasının xalq
artisti Teymur Göyçayevin rəhbərliyi altında Dövlət
Kamera Orkestri ilə məktəbin şagirdlərinin ümummilli
lider Heydər Əliyevin anadan olmasının 87-ci ildönümünə
həsr olunmuş konsertdə Əli Məlikov Y.Bramsın "Macar
rəqsi" əsərini uğurla ifa edib. Həmin il Uşaq Musiqi
və İncəsənət Məktəbi şagirdlərinin Xalq Çalğı Alətləri
üzrə II Respublika müsabiqəsində gənc istedad I yerə
layiq görülüb. M.Maqomayev adına Azərbaycan Dövlət
Filarmoniyasında xalq çalğı alətləri üzrə II Respublika
müsabiqəsi qaliblərinin yekun konsertində çıxış edərək I
dərəcəli diplomla mükafatlandırılıb. 2012-ci ildə vokal
sənətinin banisi Bülbülün anadan olmasının 115 illik
yubileyinə həsr olunmuş musiqi festivalında yüksək
səviyyədə çıxış edərək I yerə, Beynəlxalq Muğam
Mərkəzində festivalın yekun konsertində isə diplom və
medala layiq görülüb. 2012-ci il paytaxt məktəblisi
üçün daha uğurlu olub. Dövlət Xalq Çalğı Alətləri
Orkestrinin üzvü olan Əli Məlikovun adı Azərbaycan
Respublikası Prezidentinin müvafiq sərəncamı ilə
Azərbaycanın gənc istedadlarının "Qızıl kitabı"na
yazılıb və o, xüsusi aylıq təqaüdə layiq görülüb.
2014-cü il Mədəniyyət və Turizm Nazirliyinin uşaq və
gənclər arasında xalq çalğı alətləri ifaçılarının III
Respublika müsabiqəsində müvəffəqiyyətlə çıxış edən
Ə.Məlikov II dərəcəli diplomun sahibi olub.
Söhbət zamanı Əli Məlikov yaradıcılıq imkanlarının
inkişafı üçün yaradılan şəraitə görə ölkə rəhbərliyinə
təşəkkür ünvanladı və ona göstərilən etimadı
doğruldacağına söz verdi.
Hazırda gənc istedad Bakıdakı 7 nömrəli tam orta
məktəbin X sinfində təhsil alır. |
