|
Təhsil Nazirliyinin təsis etdiyi "Bilik kuboku" uğrunda
breyn-rinq intellektual oyunları davam edir. Oktyabrın
26-da bu silsilədən növbəti oyun keçirilib. "Baku
Crystal Hall"da keçirilən və AzTV kanalı ilə yayımlanan
oyunda oktyabr ayının qalibi və breyn-rinqin növbəti
finalçısı məlum olub.
Öncə ayın finalına çıxmış "Nar Mobile", "Allians" və "Aypara"
komandalarının rəqibləri olacaq dördüncü finalçı
müəyyənləşdirilib. Bu məqsədlə finala çıxmayan
komandaların təmsilçiləri arasında keçirilən şans
oyununda "Ağdaş" komandasının üzvü qalib gəlib və
komandasına ayın finalında oynamaq şansı qazandırıb.
İki seçim görüşündən birincisi də məhz bu komanda ilə "Allians"
arasında keçirilib. "Ağdaş" özünə rəqib seçdiyi "Allians"a
uduzub - 5:3.
İkinci seçim görüşündə qarşılaşan "Nar Mobile" və "Aypara"
arasında da maraqlı mübarizə gedib.
"Nar Mobile" 5:4 hesabı ilə qalib gəlib.
Finalda "Nar Mobile" ilə "Allians" oynayıblar. Hər iki
final görüşü eyni nəticə ilə - 5:1 hesabı ilə başa
çatıb. Rəqibindən üstünlüyü aşkar görünən "Nar Mobile"
oktyabr ayının qalibi olub və "Bilik kuboku"nun
finalında oynamaq hüququ qazanıb. Qalib komandanın
üzvlərinə mükafat olaraq oyunların sponsoru "Nar Mobile"
şirkətinin data kartları təqdim edilib.
Yusif ƏLİYEV,
"Azərbaycan müəllimi" |
