|
Oktyabrın 22-də Q.Qarayev adına mərkəzi incəsənət
məktəbində Rusiya Federasiyasında fəaliyyət göstərən
"Yeni adlar" ictimai fondunun nümayəndələrinin iştirakı
ilə Bakı, Sumqayıt, Xırdalan şəhərlərindəki 10-a yaxın
musiqi və incəsənət məktəbi şagirdlərinin ifaları
dinlənilib.
AzərTAc xəbər verir ki, məktəbin direktoru Kamal
Paşazadə bildirib ki, dinləmələr zamanı Mədəniyyət və
Turizm Nazirliyinin dəvəti ilə Bakıya gəlmiş "Yeni
adlar" ictimai fondunun nümayəndələri bu uşaqlar
içərisindən beş nəfər istedadlı məktəblini seçəcək. Bu
yeniyetmələrə "Yeni adlar" ictimai fondunun mükafatları
veriləcək.
Bundan başqa, onların musiqi təhsilini Rusiyada davam
etdirmələrinə kömək göstəriləcək, hər iki ölkəni təmsil
edən istedadlı uşaqların birgə konsert proqramları
təşkil olunacaq.
Həmçinin fondun nümayəndələri Bakı, Sumqayıt
şəhərlərinin musiqi və incəsənət məktəblərində "ustad
dərsləri" də keçəcəklər.
Sonra uşaqların ifalarının dinlənilməsinə başlanılıb. |
