|
 Ömür
var bir cümləyə, ömür var kitablara sığar. Onun həyatı
ilə tanış olanda adama elə gəlir ki, bu ömrün içində,
sanki, bir dəqiqə boş zaman olmayıb. Deyəsən, elə
belədir də. Bu təəssüratımızı özü ilə paylaşanda,
sadəcə, gülümsündü və bir cümlə ilə cavab verdi: "Burada
sizinlə məşğulam, amma həm də auditoriyaya qaçmalıyam".
Onun yeridiyini görmədik, həqiqətən də, hər yerə qaçır.
Hər anı keyfiyyətli zaman kəsiyi... Hər anı öyrənmə,
öyrətmə, xidmət, inkişaf üstünə inkişaf, stabil bir
dinamika... Belə bir keyfiyyətli ömrün sahibi Fəridə
Ağababa qızı Hüseynovadır.
Kimdir Fəridə Ağababa qızı Hüseynova?
Həyat faktlarının içində "itdiyimiz" Fəridə xanımın
ömrünün dinamik inkişafını az bir vaxt daxilində
qavramaq çətin olsa da, xronologiya üzrə nəzər saldıqda
müəyyən qədər təsəvvürə gətirmək mümkün olur. Qəlbən ata
yurdu Lənkərana bağlı olan Fəridə Hüseynova 1954-cü il
oktyabrın 17-də Bakıda anadan olub. Qarabağa da ürəkdən
bağlı insandır. Anası Cəbrayıldan olduğu üçün ömrünün
içində Qarabağın xüsusi payı var. Lənkəran isə etoloji
və etnoqrafik xüsusiyyətləri ilə özünə daha çox bağlayıb
Fəridə xanımı. Tərbiyəsində, dünyagörüşündə əhəmiyyətli
rol oynayan atasına bağlı olduğu qədər, ata nəslinə də
elə bağlı olduğunu söyləyir. Fəridə xanımın ömür yolunun
belə zəngin, sürətli inkişafında Bakı şəhərindəki 27
nömrəli orta məktəbin də böyük rolu olub. Ən səmimi
duyğuları kimi bu məktəbə məhəbbətini paylaşmağı
sevdiyini duyduq. Orta məktəbdə müəllimlərinin, xüsusilə
də ingilis dili müəllimlərinin etik davranışları,
pedaqoji səriştələri Fəridə xanıma müəllimlik həyatını
qazandırıb. "Müəllimlərimizin yüksəkdən səsini
eşitməmişik" deyir günümüzün nümunəvi müəllimi. Həmin
məktəbdə gördüyü bütün keyfiyyətləri öz müəllimlik
təcrübəsində dolğunlaşdırıb Fəridə müəllim.
 Ailənin
üç övladından biridir. Bacısı və qardaşı atasının
tövsiyəsi ilə həkimlik ixtisasına yiyələniblər. Fəridə
xanım isə kövrək qəlbi ilə dərdlərin şahidi olub, tab
gətirməyəcəyini bilib bu məsləhətdən imtina edib.
Entuziast xarakteri ilə öyrənməyə və öyrətməyə olan
meyli onun fəaliyyət yolunu Dillər Universitetindən
keçirib. 1976-cı ildə ali təhsil ocağını bitirib,
Azərbaycan Dövlət Bədən Tərbiyəsi Universitetinin xarici
dillər kafedrasında laborant kimi fəaliyyətə başlayan
Fəridə Hüseynova bu gün "XXI əsr" məktəbində direktor
müavini, menecer və ingilis dili müəllimidir. 2001-ci
ildə Bakı "XXI əsr" məktəbinini ilk direktoru olub.
Fəridə xanımın həyatı faktlarla o qədər zəngindir ki,
bunu yazmağa cəhd etsək, bütöv bir səhifəni tutacaq
qədər xronoloji siyahıya çevriləcək yazımız. Buna görə
də həyatındakı ən önəmli faktlara nəzər salmaqla
kifayətlənməli olacağıq. 1993-cü ilin yanvarında bp və
Statoil şirkətlərinin Azərbaycanda birgə təşkil
etdikləri Britaniya Şurasının işgüzar ingilis dili və
idarəetmə kurslarına dəvət alıb. İngiltərənin Notinqhem
şəhərindəki Trent Universitetində biznesin
idarəedilməsinin əsaslarını öyrənib. Fəridə Hüseynova
ingilis dilini səlis bildiyinə görə BBS şirkətində iş
təklifi alsa da, qəbul etməyib. 1994-cü ildə təqdimatla
Bakı Beynəlxalq məktəbində ingilis dili müəllimi kimi
işləməyə başlayıb. 1998-ci ildə Bakıda açılan Amerika
Universitetinə ibtidai təhsil üzrə direktor təyin
olunub. 2000-ci ildə təkmilləşdirmə kursu keçmək üçün
Amerikaya ezam olunub. Qayıtdıqdan sonra universitetin
bazasında fəaliyyət göstərən Beynəlxalq Mərkəzdə
çalışıb.2004-cü ilədək İsveçrədəki Kantzovska
Gimnaziyasında Kolbak şəhərciyindəki Tumbo məktəbində
ingilis dilindən, riyaziyyatdan, əməkdən, ev
təsərrüfatının idarə edilməsindən dərs deyib.
 Belə
bir zəngin iş təcrübəsinin sayəsində Fəridə müəllim bu
gün "XXI əsr" məktəbinin müəllim kollektivini şəxsən öz
rəhbərliyi altında yetişdirir, valideynlərlə görüşlər
təşkil edir, təhsil problemləri ilə bağlı seminarlar
keçirir. Fəridə xanımın fəaliyyəti timsalında yaxından
şahidi olduq ki, "XXI əsr" məktəbi şəxsiyyətyönümlü
təhsil siyasətinə xidmət göstərməkdədir.
Fəridə Hüseynovanın iş təcrübəsinin dinamik inkişaf
tarixçəsi təhsil strategiyamızın ömür boyu təhsil
siyasətinin dərk olunması, təbliğ edilməsində əyani
nümunədir.
Xeyriyyəçilik
fəaliyyəti
Müəllimlik insanda fitri bir xüsusiyyətdir. Hər kəs
müəllim ola bilməz. Amma müəllim olan insan yalnız daxil
olduğu auditoriyanı deyil, bütün cəmiyyəti, hətta bütün
bəşəriyyəti duyur. İnsanlığın dərdini, sevincini yumruğu
boyda olan ürəyindən keçirir. Fəridə Hüseynovanın da
alovu sönməyən qəlbi daim cəmiyyətin hər təbəqəsinə can
ataraq istilik paylamağa məsul bir müəllim ürəyidir.
Fəridə xanım auditoriyalarda uşaqlara yalnız ingilis
dili dərsi tədris etməklə, təhsil problemlərinin həllini
seminarda müzakirə etməklə kifayətlənməyib. O, həmçinin
ayrı-ayrı bölgələrdə qayğıya ehtiyacı olan insanlara
yardım etməyə də can ataraq əlindən gələni edib. 1994-cü
ildən Beynəlxalq Qadınlar Klubunun üzvü olaraq 2001-ci
ilə qədər xeyriyyəçilik təşəbbüslərini həyata keçirib.
Ehtiyacı olan qocaları və uşaqları ziyarət edərək
tələbatlarını ödəməyə səy göstərib. Onların da məhəbbət
payını əsirgəməyib. Tarixi fakta nəzər saldıqda görürük
ki, bu, vətənimizin ən ağır illərinə təsadüf edir.
Müəllim məhz o adamdır ki, yalnız isti, rahat otaqlarda
deyil, lazım gəldikdə səngərdə belə öz elmi ilə yararlı
olur.
Həyat
fəlsəfi məktəb, hər düşünən insan filosofdur
 Ömür
boyu təhsil prinsipini öz həyatında uğurla tətbiq edən
Fəridə müəllim pedaqoq, menecer, psixoloq olmaqla
yanaşı zəngin fəlsəfi-estetik duyuma malik bir
şəxsiyyətdir. Mədəniyyətin, incəsənətin hər sahəsinə
maraq göstərir, hər sahəyə öz yanaşması var. Bizimlə
söhbətində daha çox milli mədəniyyətimizin üzərində
durdu. Musiqi sahəsində Rəşid Behbudov, Şövkət
Ələkbərovanın sənətinin pərəstişkarıdır. Rəssamlardan
Toğrul Nərimanbəyovun rəsmlərinin onun fəlsəfəsinə daha
yaxın olduğunu söylədi. Xüsusilə, "Nar ağacı" rəsmi
fəlsəfi anlamı ilə diqqətini çəkir. Peyzaj və natürmort
janrlarını çox sevir. Təbiətcə qaynar olan Fəridə
müəlllim təbiətin sakit, susqun halının ifadəsinin
təsvirinə üstünlük verir. Dalğalı dəniz rəsmlərini
divarına asan adamlara təəccüblənir. Dənizin də sakit
halını sevir. Görünür ki, hər zaman hər yerə qaça-qaça
gedən, bir an işsiz qalmayan insanın daxilində böyük bir
təmkin, səbat, güvənlik var.
Azərbaycan ədəbiyyatından Nizaminin vurğunudur Fəridə
Hüseynova. Bu böyük dühanı dünya ədəbiyyatında Şekspirlə
yanaşı tutur, müqayisə edir. Ömər Xəyyamın fəlsəfəsi isə
müəllimin həyata baxışlarının tam ifadəsidir.
Fəridə müəllimin həyat fəlsəfəsi Qolsuorsinin
"Forsaytlar haqqında saqa" əsərində öz ifadəsini tapır.
Bir ailə şəcərəsi, tarix, ölkə məfhumlarının qovşağını
təşkil edən bu əsəri Fəridə müəllim fərdi həyatın tarix
və dünya kontekstində əksi kimi ən uğurlu sənət nümunəsi
hesab edir. O, hər bir şəxsin öz nəsil şəcərəsini
öyrənməsinə məsul olduğu qənaətindədir. Öz nəsil ağacını
canlandırmağa cəhd edərkən müəllim belə bir maraqlı
faktla üzləşib ki, atasının nənəsi Səudiyyə
Ərəbistanından olub.
Hər bir sənət nümunəsinə fəlsəfi aspektdən yanaşan
Fəridə müəllim filosoflara xüsusi maraq göstərməyib.
Fəlsəfəni həyatdan öyrəndiyini deyir. Həyat özü bir
məktəbdir, ona idrakla yanaşan insan artıq filosofdur.
"Uşaqlar qanadlarla doğulur, müəllimlər onlara uçmağı
öyrədir"
Fəridə xanım hesab edir ki, hər kəs müəllim ola bilməz.
Əgər insanın qəlbində bəşəriyyətə sevgi alovu yoxdursa,
o, alturist deyilsə, müəllim olmasa yaxşıdır. Müəllimlik
fədakarlıqdır. Fəridə Hüseynovanın otağının divarları
müəllimlik haqqında şüarlarla örtülüdür:
"Əvvəl sev, sonra öyrət".
"Əgər müəllim yanmırsa, şagirdlər də alışmayacaq"
"Müəllim bələdçidir."
"Müəllimlik ixtisas deyil, bu, ehtirasdır."
"Heç vaxt təslim olmamaq" həyat prinsipidir
Həyata entuziast yanaşması, optimist baxışları Fəridə
Hüseynovaya neqativ sözünü yaxın buraxmayıb. Hər
dəyişiklik artıq inkişaf deməkdir onun üçün.
Təhsilimizdə baş verən dəyişikliklərə də belə bir böyük
ümidlə baxır. Burada nəsə dəyişirsə, demək cəmiyyətin
xeyrinədir, demək artıq inkişaf var.
Otağında başının üzərinə kiçik bir rəsm asıb. Rəsmin
fəlsəfəsi budur: "Düşünməyin ki, kimsə sizi udursa,
artıq yemişdir". Sona qədər mübarizə, hətta ümid olmasa
belə təslim olmamaq prinsipi ilə yaşamaq onun həyat
uğurunun başlıca amilidir.
Könül NƏHMƏTOVA
konul.nehmetova@mail.ru
foto Rəşad RAMAZANOĞLUNUNDUR |
