|
 Təhsil
Problemləri İnstitutunda riyaziyyat, fizika, kimya,
gənclərin çağırışaqədərki hazırlığı fənləri üzrə 16, 17,
21, 22 oktyabr tarixlərində işçi qruplarının görüşü
keçirilib. İnstitutun direktoru, hüquq üzrə fəlsəfə
doktoru Qulu Novruzov, şöbə müdirləri və bir qrup
əməkdaşın iştirak etdiyi görüşdə "Azərbaycan
Respublikasında təhsilin inkişafı üzrə Dövlət
Strategiyası"ndan irəli gələn məsələlər barədə ətraflı
danışdı. Natiq Azərbaycan təhsil sistemində hazırda
tətbiq olunan mövcud fənn kurikulumları, adıçəkilən
fənlərin ali və orta ixtisas məktəblərində tədrisinin
indiki vəziyyəti, yüksək keyfiyyətli tədrisin həyata
keçirilməsində riyaziyyat, fizika, kimya, gənclərin
çağırışaqədərki hazırlığı və digər fənn
kurikulumlarının məzmunu və müasir tələblərə uyğun
məzmunda ediləcək təkmilləşdirmələrin, həmin fənni
tədris edən müəllimlərin peşəkarlıq səviyyələrinin
artırılması və s. məsələlər ətrafında geniş məlumat
verdi.
Qulu Novruzov görüşdə iştirak edən işçi qrupların
qarşısında duran vəzifələrdən söhbət açdı. O,
"Azərbaycan Respublikasında təhsilin inkişafı üzrə
Dövlət Strategiyası" çərçivəsində ölkəmizdə aparılmış
təhsil islahatlarının reallaşdırılmasında, həmçinin 12
illik təhsilə keçidlə əlaqədar olaraq bütün fənlərdə
məzmunda yeniliklərin də olacağını vurğuladı. Hazırda
mövcud olan kurikulumların məzmununda müəyyən
dəyişikliklərin edilməsi qaçılmazdır. Bu işdə
ixtisasını mükəmməl bilən fənn müəllimlərinin üzərinə
böyük məsuliyyət düşür. Qulu Novruzov müasir dərslərin
keçilməsi zamanı görünən boşluqları məhz azərbaycanlı
müəllimlərin dolduracağını bildirdi. İntellektual təhsil
üçün məhz yeni məzmunu tam bilən müəllimlərin
təkliflərinin önəmli olmasını vurğuladı.
Görüşdə iştirak edən riyaziyyat, fizika, kimya,
gənclərin çağırışaqədərki hazırlığı fənləri üzrə işçi
qruplarının üzvləri, fənn mütəxəssisləri, ali və orta
ixtisas təhsili müəssisələrinin müəllimləri, dərslik
həmmüəllifləri və b. mövzu ətrafında çıxışlar etdilər,
təkliflərini söylədilər. |
