|
 "ADA"
Universitetinin İxtisasartırma Proqramı Cenevrə
Təhlükəsizlik Siyasəti Mərkəzi, Latviyanın Xarici İşlər
Nazirliyi və İsveçrənin Azərbaycandakı səfirliyi ilə
birgə həyata keçirdiyi əfqan dövlət rəsmiləri üçün "Keçid
dövründə dövlət quruculuğu" adlı 5-ci Bakı kursuna start
verilib.
Universitetin mətbuat xidmətindən AzərTAc-a bildirilib
ki, oktyabrın 20-29-da keçiriləcək təlim kursunun rəsmi
açılışında "ADA" Universitetinin rektoru Hafiz Paşayev,
İsveçrənin Azərbaycandakı səfiri Paskal Obişer,
Latviyanın Azərbaycandakı səfiri Hardiys Baumanis və
Əfqanıstanın ölkəmizdəki müvəqqəti işlər vəkili Miraslam
Vazeri iştirak ediblər.
Rektor Hafiz Paşayev açılış mərasimində çıxış edərək
deyib ki, təlim kursları zamanı 20 əfqan dövlət rəsmisi
fərqli sistemlər çərçivəsində gender, sülh və ədalət,
medianın idarə edilməsi, keçid dövründə insan hüquqları,
hökumət və ədalət sistemləri daxilində korrupsiya ilə
mübarizə, təhsil, vətəndaş cəmiyyəti, insan
təhlükəsizliyi, vətəndaş hərəkatları və ekstremizmlə
mübarizə kimi mövzular ətrafında məlumatlandırılacaqlar.
Eyni zamanda, iştirakçılar "ADA"-nın kampusu və Bakının
bir sıra tarixi əhəmiyyətli yerləri ilə də tanış olmaq
imkanı əldə edəcəklər.
Təlim kurslarının sonunda iştirakçılar sertifikatla
təltif olunacaqlar. |
