|
Rusiya prezidenti ən yaxşı müəllimlərlə görüşüb
 Son
illərdə Rusiyada keçirilən "İlin müəllimi"
müsabiqəsinin qalibləri arasında xüsusu maraq,
prezidentlə görüşmək ənənəsi mövcuddur. "Uçitelskaya
qazeta"nın məlumatına əsasən, müəllimlər bu anı
səbirsizliklə gözləyir və öz suallarını dövlət
başçısına ünvanlamaq ümidi ilə həyəcanlanırlar. Ötən
il olduğu kimi, bu il də prezident Vladimir Putin
Rusiyanın 15 ən yaxşı müəllimini özünün Novo-Oqaryovo
ətrafındakı iqamətgahında qəbul edib. Görüşdə Rusiya
Federasiyasının təhsil və elm naziri Dmitri Livanov
və prezidentin köməkçisi Andrey Fursenko da iştirak
ediblər.
V.Putin "İlin müəllimi" müsabiqəsinin final mərhələsinə
çıxmış müəllimləri təbrik edib: "Mən sizi finala
çıxmağınız münasibəti ilə təbrik etmək istəyirəm. 80
min namizəd arasından 15 ən yaxşı müəllim sırasına
düşmək - bu, böyük nailiyyətdir, sizin
xidmətlərinizin, fəaliyyətinizin nəticələrinin
tanınmasıdır. Mən sizə müsabiqənin uğurla başa
çatmasını və gələcək işlərinizdə nailiyyətlər
arzulamaq istəyirəm. Aydındır ki, 15 nəfər arasından 5
nəfər, daha sonra bu cür yüksək səviyyədə "5-liyi",
xüsusən də qalibi seçmək çox mürəkkəb məsələdir.
Məncə, müsabiqənin özü məhz onunla əlamətdardır ki, o,
motivasiyanı gücləndirir. Bildiyim qədər, təkcə sizlər
deyil, həm həmkarlarınız , həm də sizin şagirdləriniz
bu prosesə cəlb olunublar. Ölkəmizdə 1 milyon 232 min
pedaqoq var, təsəvvür etmək olar ki, nə qədər insan bu
prosesdə iştirak edir. Proses, şübhəsiz ki, istər
peşəkarlıq nöqteyi-nəzərdən, həm də ictimai cəhətdən
pozitiv xarakter daşıyır. Bugünkü görüşümüzdə trivial
mövzulardan, mən əməkhaqlarının səviyyəsini nəzərdə
tuturam, yan keçə bilmərik. Siz son illər hökumət
və dövlət başçısı tərəfindən bu məsələyə necə diqqət
göstərildiyini bilirsiniz. Yəqin ki, burada bu məsələ
ilə bağlı da deyiləsi fikirlər var. Əlbəttə ki, mən
yenə də sizin yüksək missiyanızdan danışmaq istərdim.
İstənilən cəmiyyətdə müəllim, həkimdən vacib peşələr
yoxdur. Hərbiçilərsiz də ötüşmək olmaz, lakin hamısı bir
sıradadır. Mən sizə uğurlar arzulamaq istərdim".
Daha sonra prezident sözü ölkənin təhsil və elm naziri
Dmitri Livanova verib. Nazir çıxışında qeyd edib ki,
artıq 25 ildir ki, "İlin müəllimi" müsabiqəsi
keçirilir. Bu müsabiqə Rusiyada ən nüfuzlu peşəkar
müsabiqədir. Bu müsabiqənin sədri MDU-nin rektoru
Viktor Sadovniçi olmaqla çox nüfuzlu münsiflər heyəti
var. "Biz əminlklə deyə bilərik ki, ildən-ilə
müsabiqənin final mərhələsinə həqiqətən ən layiqli, ən
yaxşı pedaqoqlar keçir. Biz ildən-ilə pedaqoqların
peşəkarlıq səviyyəsinin, ustalığının, motivasiyasının
artmasının şahidi oluruq". Söhbətə müdaxilə edən
prezident V.Putin əlavə edib ki, müəllimlər arasında
peşəkarlığın artmasının müasir şəraitdə çox böyük
əhəmiyyəti vardır. Çünki bugünkü tələblərə cavab vermək
çox çətindir. "Müəllimlər həm qətiyyət, həm yaradıcılıq
vərdişlərini, həm də öz istedadlarını göstərməlidirlər.
Müəllim bunlarsız bugünkü şagird üçün praktik olaraq
maraqsızdır. Əgər əvvələr müəllim, ola bilsin, yeganə
informasiya mənbəyi idisə, indi bu cür mənbələr olduqca
çoxdur".
Daha sonra müəllimlərin prezidentə sual vermək imkanları
yaranıb. Tatarıstan Respublikasından biologiya müəllimi
Alla Qolovenkinanın "Müsabiqəyə qatılanlar arasında
pedaqoji dinastiyadan olan müəllimlər çoxdur. Sizin
ailənizdə də müəllim varmı və ya olubmu" sualına
prezident "Yox, çox təəssüflər olsun ki, bizim ailədə
müxtəlif dinastiyaların təmsilçiləri var, həm hərbiçi,
həm də həkim. Məncə, müəllim yoxdur. Bu çox yaxşı
haldır ki, nəsillərdən nəsillərə təkcə bilik yox, həm də
öz işinə qarşı mənəvi-əxlaqi dəyərlər də ötürülür",-deyə
cavab verib.
Ulyanovsk vilayətindən olan tarix və ictimaiyyat
müəllimi E.Fedotova "İlin müəllimi" müsabiqəsinin
beynəlxalq səviyyədə keçirilməsi barədə təklif irəli
sürüb. Dövlət başçısı bu təklifi razılıqla
qarşılayıb. Maqnitoqorsk şəhərindən olan ədəbiyyat,
dini mədəniyyətin əsasları və dünyəvi etika müəllimi
Anna Stelmaxoviç yeniyetmələr üçün xüsusi kanalın
yaradılması ilə bağlı prezidentə müraciət edib. Bu
ideya dövlət başçısının xoşuna gəlib və o, dərhal
belə bir kanalın yaradılması barədə köməkçisi Andrey
Fursenkoya tapşırıq verib. Prezidentə ünvanlanan
suallar o qədər də çox olmayıb, lakin ölkə başçısı
onlara ətraflı və konstruktiv cavablar verib.
Pedaqoqlar "Uçitelskaya qazeta"ya da minnətdarlıqlarını
bildirməyi unutmayıblar. Belə ki, "İlin müəllimi"
müsabiqəsinin keçirilməsi ideyası məhz bu qəzetə
məxsusdur.
"Uçitelskaya qazeta"dan
Müəllimlərin maddi durumu yaxşılaşıb
 2013-2014-cü
illərdə Avropanın 16 ölkəsində (Belçika, Danimarka,
Almaniya, Estoniya, Fransa, Xorvatiya, Lüksemburq,
Malta, Avstriya, Slovakiya, Finlandiya, Böyük Britaniya,
Norveç, Makedoniya, Türkiyə) müəllimlərin maaşında artım
müşahidə olunub. Bu barədə "Eurydice" təşkilatının
Avropa Komissiyası üçün hazırladığı hesabatda deyilir.
Əməkhaqları və yaşayış xərclərinə edilən dəyişikliklər
müəllimlərin maddi durumunun yaxşılaşmasına imkan
verib. Araşdırma ibtidai və orta məktəb müəllimləri və
direktor heyətini əhatə edib. Araşdırma nəticəsində
məlum olub ki, 33 Avropa ölkəsinin 50 faizində
müəllimlərin alıcılıq qabiliyyəti 2009-cu illə
müqayisədə aşağıdır.
Bəzi ölkələrdə - Belçika (Niderland hissəsi), Danimarka
(ibtidai təhsil və orta təhsilin 2-ci səviyyəsi), Litva,
Lüksemburq, Avstriya, Finlandiya (ibtidai təhsil və orta
təhsilin 1-ci səviyyəsi) və İtaliyada (orta təhsilin
2-ci səviyyəsi) müəllimlərin alıcılıq qabiliyyəti 3%
aşağı düşüb. Kipr, İtaliya (ibtidai təhsil və orta
təhsilin 1-ci səviyyəsi), Niderland, Portuqaliya,
Rumıniya (ibtidai təhsil) və Böyük Britaniyada
müəllimlərin alıcılıq qabiliyyətində 5%-dən 10%-ə kimi
azalma müşahidə olunub. Sloveniya və İsrail
müəllimlərinin də alıcılıq qabiliyyəti 13%-dən 17%-ə
kimi azalıb. Ən böyük azalma isə Yunanıstanda - 40%
olub.
Almaniyada ali təhsil pulsuzdur
 2014-2015-ci
dərs ilindən başlayaraq Almaniyanın bütün ərazisində ali
təhsil pulsuzdur. Ölkənin federal torpaqlarından
sonuncu olaraq Aşağı Saksoniya ötən ilin dekabrından
təhsil haqlarından imtina edib. "The Times" qəzetinin
yazdığına əsasən, Hamburq şəhərinin Elm Komitəsinin
senatoru Doroteya Ştapelfeldt bəyan edib ki, "təhsilə
görə pul ödənməsi sosial ədalətsizlikdir". Onun
sözlərinə görə, ölkə siyasətinin başlıca vəzifəsi
Almaniyada gənclərn keyfiyyətli ali təhsil almasına
imkan yaratmaqdır. Qeyd edək ki, 2005-ci ildə
Almaniyanın Konstitusiya Məhkəməsi federal torpaqlara
ali məktəblərdə təhsil haqlarının müstəqil surətdə
tətbiq olunması səlahiyyəti verib. Bu yeniliyi tətbiq
edən yerli hakimiyyət orqanları bir ildən sonra
tələbələrin kütləvi etiraz aksiyaları ilə
qarşılaşıblar. Semestr ərzində 500, il ərzində 1000
avro təhsil haqqı 2 və ya 3 övladı ali təhsil alan
alman ailələri üçün əlçatmazdır. Tələbələrin
aksiyalarından sonra Aşağı Saksoniyadan başqa bütün
federal torpaqlar təhsil haqlarını ləğv ediblər. Lakin
aparılmış sosioloji sorğulara əsasən almanların bir
qismi hesab edir ki, tələbələrin bir çoxu əldə etdikləri
biliklərə görə təhsil haqqını ödəyə bilər və buna
hazırdırlar. Onlar hesab edirlər ki, ali məktəblərdə pul
vəsaitlərinin çatışmazlığı ali təhsilin keyfiyyətinə
mənfi təsir göstərə bilər.
Rusiyanın ən qocaman müəlliminin 91 yaşı tamam olur
 "Uçitelskaya
qazeta"nın məlumatına əsasən, ömrünün 72 ilini pedaqoji
fəaliyyətə həsr etmiş Çeçenistan Respublikasının fəxri
vətəndaşı Şirvani Ququyev müəllimlik fəaliyyəti
dövründə bir dəfə də olsun xəstəlik tarixçəsi
açdırmayıb. O hətta eynəkdən belə istifadə etmir, onu
göz həkiminin qəbuluna dəvət edəndə səmimiyyətlə
təəccübünü gizlədə bilmir. Oğlanları onu dəfələrlə
məktəbdən ayırmaq istəsələr də, buna nail ola
bilməyiblər. Şirvani müəllim yenə də məktəbdədir.
Dekabrda 91 yaşı tamam olacaq qocaman müəllim zamanla
ayaqlaşmaq istəyir. O, hazırda kompüter texnologiyaları
ilə maraqlanır və özünə mobil telefon almağı düşünür.
Jurnalistlərlə söhbətdə Şirvani müəllim özünün tədris
prinsiplərindən danışıb. O, şagirdlərinə heç vaxt "2"
yazmır. "Mən heç vaxt "2" yazmıram, bunu səhv hesab
edirəm, çünki bu cür uşaqlarda həyatda da "2" almağa
alışqanlıq yaranır. Mən onlara həyatdan "5" almağı
öyrədirəm",-deyə qocaman müəllim bildirib. Onun
sözlərinə görə, "çətin " uşaqları tərifləyəndə və ya
mükafatlandırdıqda onlar bu qiymətə layiq olmağa can
atırlar. Ş.Ququyev 72 illik müəllimlik fəaliyyəti
dövründə yüzlərlə uşağa təlim-tərbiyə verib və heç bir
şagirdinə görə xəcalət çəkməli olmayıb, onların
hamısı müəllim, mühəndis, alim və ya sadəcə nümunəvi
vətəndaş olublar.
Səhifəni hazırladı: Oruc MUSTAFAYEV,
"Azərbaycan müəllimi"
xarici mətbuat materialları əsasında |
