|
Azərbaycan Respublikasında fəaliyyət göstərən ümumi
təhsil müəssisələrinin IX-XI siniflərində təhsil alan
şagirdlərin elmi axtarışlara sövq edilməsi, onların elmi
və yaradıcılıq fəaliyyətinin stimullaşdırılması, elmi
tədqiqat işinə meyli olan istedadlı şagirdlərin vaxtında
aşkar edilməsi, həmçinin ciddi elmi tədqiqat
nəticələri əldə etmiş Azərbaycan məktəblilərinin seçilib
ABŞ-da keçirilən İntel İSEF - Beynəlxalq Elm və
Mühəndislik Sərgisinə göndərilməsini təmin etmək məqsədi
ilə Azərbaycan Respublikasının Təhsil Nazirliyi haqqında
Əsasnamənin 13.5-ci bəndini rəhbər tutaraq
ƏMR EDİRƏM:
1. 2015-ci il 12-14 fevral tarixlərində İntel İSEF -
Beynəlxalq Elm və Mühəndislik Sərgisi çərçivəsində
"Sabahın alimləri" IV Respublika Müsabiqəsi keçirilsin.
2. Nəzərə alınsın ki, "Sabahın alimləri" IV Respublika
Müsabiqəsi Azərbaycan Respublikasının Təhsil Nazirliyi,
Azərbaycan Respublikasının Gənclər və İdman Nazirliyi,
Azərbaycan Təhsil İşçiləri Azad Həmkarlar İttifaqı
Respublika Komitəsi və "Mədəd" təşkilatının birgə
təşkilatçılığı ilə həyata keçirilir.
3. Ümumi təhsil müəssisələrinin direktorlarına
tapşırılsın:
3.1. Kiçik Akademiyaların fəaliyyətini gücləndirmək
istiqamətində konkret tədbirlər görülsün;
3.2. Ali təhsil müəssisələri və elmi təşkilatlarda
çalışan alimlərlə ümumtəhsil məktəbinin əlaqələrinin
genişləndirilməsi və şagirdlərin tədqiqatlara cəlb
olunması təmin edilsin;
3.3. 2014-cü il 15 oktyabr tarixindən etibarən
şagirdlərin "sabahinalimleri.edu.az" saytında "online"
rejimində qeydiyyatdan keçirilməsi, 15 dekabr
tarixinədək şagirdlər tərəfindən aparılan tədqiqatların
başa çatdırılması təmin edilsin;
3.4. Müsabiqənin Təlim Akademiyasında iştirak etmək
istəyən müəllimlərin qeydiyyatdan keçməsi təmin edilsin.
4. Müsabiqəyə elmi dəstəyin verilməsi Bakı Dövlət
Universiteti (A.Məhərrəmov), Azərbaycan Texniki
Universiteti (H.Məmmədov), Sumqayıt Dövlət Universiteti
(E.Hüseynov) və Naxçıvan Dövlət Universitetinə
(S.Məhərrəmov) tövsiyə edilsin.
5. Naxçıvan Muxtar Respublikasının ümumi təhsil
müəssisələrində müsabiqənin təşkili ilə bağlı
məsələlərin həlli Naxçıvan Muxtar Respublikasının təhsil
naziri P.Nağıyevə həvalə edilsin.
6. Şəhər və rayon təhsil şöbələrinə müsabiqənin təşkili
ilə bağlı məsələlərin həllində ümumi təhsil
müəssisələrinə köməklik göstərilməsi tapşırılsın.
7. Təhsil Nazirliyi Elm və ali təhsil şöbəsinin müdiri,
müsabiqənin direktoru G.Hüseynovaya tapşırılsın:
7.1. Müsabiqənin yüksək səviyyədə keçirilməsi üçün
hazırlıq işlərinin görülməsini təmin etsin;
7.2. Müsabiqənin Təlim Akademiyasının təşkilini və
treninqlərin keçirilməsini təmin etsin;
7.3. Müsabiqənin Münsiflər Heyətinin tərkibi haqqında
təkliflər hazırlayıb təsdiq üçün Nazirliyin rəhbərliyinə
təqdim etsin;
7.4. İqtisadiyyat şöbəsi (R.Orucov) ilə birlikdə
müsabiqənin xərclər smetasını hazırlayıb təsdiq üçün
Nazirliyin rəhbərliyinə təqdim etsin.
8. Təhsil Sisteminin İnformasiyalaşdırılması İdarəsi
(S.Məmmədov) müsabiqəyə texniki dəstəyin verilməsi (müvafiq
elektron xidmətlərin göstərilməsi) ilə bağlı müvafiq
tədbirlərin görülməsini təmin etsin.
9. İnformasiya şöbəsi (E.Əliyev) əmrin "Azərbaycan
müəllimi" qəzetində dərc olunmasını, Nazirliyin internet
səhifəsində yerləşdirilməsini, eləcə də çoxaldılıb
aidiyyəti müəssisələrə göndərilməsini təmin etsin.
10. Əmrin icrasına nəzarət nazir müavini C.Bayramova
həvalə edilsin.
Mikayıl CABBAROV,
Azərbaycan Respublikasının təhsil naziri
3 oktyabr 2014-cü il |
