|
Qəbələ şəhərində Azərbaycan Respublikası Dövlət Gömrük
Komitəsi İdman Sağlamlıq Mərkəzinin yaranmasının 15
illik yubileyinə həsr olunmuş taekvando idman növü üzrə
açıq birincilik keçirilib. Yarışın rəsmi açılış
mərasimində Mərkəzin baş direktoru, Gömrük Xidməti
polkovniki, Milli Olimpiya Komitəsinin vitse-prezidenti
Xəzər İsayev, Azərbaycan Taekvando Federasiyasının
nümayəndəsi Rəşad Əhmədov və başqaları idmançılar
qarşısında çıxış edərək turnirin əhəmiyyətindən,
dövlətimizin idmana göstərdiyi qayğısından,
taekvandonun inkişafı və son nailiyyətlərindən bəhs
ediblər. Yarışa Dövlət himninin səslənməsi ilə start
verilib.
Dövlət Gömrük Komitəsi İdman Sağlamlıq Mərkəzi və
Azərbaycan Taekvando Federasiyası (ATF) tərəfindən
təşkil edilən yarışda 2003-2005-ci il və 2000-2002-ci il
təvəllüdlü yeniyetmələr mübarizəyə qoşulublar.
Respublikanın bölgələrində fəaliyyət göstərən taekvando
bölmələrindən 13 komandadan 150 idmançının qatıldığı
açıq birincilik Qəbələ Şəhər Olimpiya İdman Kompleksində
baş tutub. Gərgin keçən mübarizənin sonunda qaliblərə
Dövlət Gömrük Komitəsi İdman Sağlamlıq Mərkəzi
tərəfindən medal, diplom və digər qiymətli mükafatlar
təqdim olunub. |
