|
 Oktyabrın
5-i biz müəllimlərin peşə bayramıdır. Müəllim adı
dünyanın hər yerində qürurla, hörmətlə səslənir.
Təsadüfü deyil ki, UNESCO 1966-cı il oktyabrın 5-də hər
il Beynəlxalq Müəllimlər Gününün qeyd olunması ilə bağlı
qərar verib. Bu təşkilat eyni zamanda müəllimlərin
statusunun artırılması ilə bağlı tövsiyə xarakterli
sənəd də qəbul edib. İndi dünyanın 100-dən çox ölkəsi
müəllimlərin peşə bayramını yüksək səviyyədə keçirir.
Ulu öndər Heydər Əliyev Azərbaycan Respublikasında bu
günün qeyd olunması ilə əlaqədar xüsusi sərəncam
imzalamışdır.
Qeyd edək ki, dünyanın ən böyük dahiləri öz
müəllimlərini heç vaxt unutmamış, onları həmişə
xatırlamış və yad etmişlər. Ümummilli lider Heydər
Əliyev də öz müəllimləri haqqında həmişə ehtiramla
danışırdı. Ulu öndər Azərbaycana rəhbərlik etdiyi hər
iki dövrdə müəllimlərin əməyini yüksək dəyərləndirmiş,
onlara dövlət səviyyəsində qayğını əsirgəməmişdir.
"Mən müəllim adından yüksək ad tanımıram", - deyən ulu
öndərin müəllimə göstərdiyi yüksək ehtiram gənc nəslin
də yararlana biləcəyi əvəzsiz örnəkdir. Ulu öndər hər
zaman müdrikliklə vurğulamışdır ki, yüksək savadlı,
intellektual səviyyəli müəllimlər olmadan cəmiyyətin
hərtərəfli inkişafını təmin etmək mümkün deyil.
Ulu öndər müəllimlərin əməkhaqqının artırılması, onlara
fəxri adların verilməsi ilə əlaqədar sərəncamlar
imzalamışdır. Təqdirəlayiq haldır ki, bu ənənə son 11
ildə də Azərbaycan dövlətinin başçısı möhtərəm Prezident
İlham Əliyev tərəfindən uğurla davam etdirilir.
Dövlət müəllimlərin gərgin və gərəkli əməyinin
stimullaşdırılmasına diqqət və qayğı ilə yanaşır.
Müəllimlərin maaşlarında vaxtaşırı artımlar olur.
Müəllimlər orden və medallarla təltif edilirlər,
"Əməkdar müəllim" fəxri adına layiq görülürlər. Hər il
ölkə üzrə "Ən yaxşı ümumtəhsil məktəbi", "Ən yaxşı
müəllim" nominasiyaları üzrə müsabiqələr keçirilir.
Qalib gələn məktəblərə və müəllimlərə diplom və pul
mükafatları verilir.
Azərbaycanda mükəmməl müəllim kadrlarının hazırlanması
və onların təkmilləşdirilməsi də həmişə gündəmdə olan
məsələdir. Bu məsələdə bir amil xüsusi diqqətdə
saxlanılır ki, bu gün həm dövlət, həm də cəmiyyət
müəllimə yüksək tələbkarlıqla yanaşır. Çünki müəllim
təkcə yazıb-oxumağı öyrədən şəxs deyil, dərin və
hərtərəfli biliyə, yüksək intellektə malik
mütəxəssisdir. Başqa sözlə, hər bir müəllim elmi-nəzəri
hazırlığı, pedaqoji ustalığı, metodiki cəhətdən
kamilliyi, idarəetmə qabiliyyəti, yaradıcı münasibəti,
təşəbbüskarlığı, prinsipiallığı ilə fərqlənməlidir.
Yalnız bu halda o, cəmiyyətdə öz nüfuzu ilə seçilə
bilər.
Bu günün müəllimi ümumi təhsilin müasir məzmununun
müəyyənləşdirilməsində, dərsliklərin hazırlanmasında
tanınmış mütəxəssis və alimlərin bərabərhüquqlu
tərəfdaşına çevrilib.
Azərbaycanın ən ucqar kəndlərində də bu gün müasir
məktəb binaları inşa edilir. Heydər Əliyev Fondunun
"Yeniləşən Azərbaycana yeni məktəb" layihəsi ölkənin
bütün vətəndaşlarında iftixar hissi oyadır. Bu
istiqamətdə Fondun prezidenti, UNESCO-nun və İSESCO-nun
xoşməramlı səfiri, Milli Məclisin deputatı Mehriban
xanım Əliyevanın təşəbbüsləri və fəaliyyətini hamı
alqışlayır.
Təbii ki, müasir, yeni məktəbdə həm də yüksək ixtisaslı,
günün tələblərinə cavab verən müəllimlər çalışmalıdır.
Qarşıdan 5 oktyabr - Beynəlxalq Müəllimlər Günü gəlir.
Bütün müəllimləri peşə bayramımız münasibətilə təbrik
edir, onlara şərəfli fəaliyyətində uğurlar arzulayıram.
Rəna ƏSGƏROVA,
Xırdalan şəhər 3 nömrəli məktəb-liseyin
informatika müəllimi |
