|
 Qəzetimizin
26 sentyabr 2014-cü il tarixli 37 nömrəli sayında Böyük
Britaniyanın "Quacquarelli Symonds" şirkətinin dünyanın
200 ən nüfuzlu ali məktəblərinin reytinq cədvəli (QS
World University Rankings) dərc olunub. Oktyabrın 2-də
isə Britaniyanın Times Higher Education jurnalı
2014-2015-ci illər üzrə dünyanın 400 ən yaxşı
universitetinin növbəti reytinq cədvəlini açıqlayıb.
Ali məktəblərin akademik nüfuzunun ən böyük beynəlxalq
tədqiqatçılarından hesab olunan Times Higher
Education-un növbəti araşdırması dünya ölkələrindən 10
minə yaxın ali məktəbi əhatə edir. Reytinq Thomson
Reuters kompaniyasının təqdim etdiyi ali məktəblərin
fəaliyyətini əks etdirən məlumatlara əsaslanır.
Reytinq cədvəlinə artıq 3 ildir ki, fasiləsiz olaraq
Amerikanın Kaliforniya Texnologiya Universiteti başçılıq
edir. Dünyanın 200 ən nüfuzlu universitetlərinin
siyahısına əsasən Amerika və Böyük Britaniya
universitetləri liderlik edir. İlk 10-luqda Amerika 7,
Böyük Britaniya 3 ali məktəblə təmsil olunur. Harvard
Universiteti Oksford Universiteti ilə birlikdə
siyahının 2-3-cü sırasında yerləşib. Stenford
Universiteti 4-cü, Kembric Universiteti isə 5-ci yeri
tutublar. M.V.Lomonosov adına Moskva Dövlət
Universiteti nəhayət ən yaxşı 200 universitet arasında
yer ala bilib. MDU 200 ən yaxşı ali məktəb
sıralamasında 196-cı yeri tutub. Times Higher Education
jurnalının redaktoru Fill Beyt Rusiyanı dünyanın 200 ən
yaxşı universitetləri sırasına qayıtması münasibətilə
təbrik edib. MDU və Rusiyanın daha 2 ali məktəbi -
Novosibirsk Dövlət Universiteti və Moskva Fizika
Mühəndislik İnstitutu təbiət elmləri üzrə 100 ən yaxşı
universitetlər sırasına düşə biliblər. Ən yaxşı 200
universitet sıralamasında liderlik ABŞ-a məxsusdur.
Amerika reytinqdə ən çox - 74 universitetlə, Böyük
Britaniya 29, Almaniya 12 ali məktəblə təmsil olunib.
Reytinq müəllifləri qeyd edirlər ki, 2013-cü illə
müqayisədə ABŞ və Böyük Britaniya mövqelərini
itirməkdədirlər. 2013-cü ildə ilk 200-lükdə 77 ABŞ, 31
Böyük Britaniya ali məktəbi yer alıb. Asiyanın aparıcı
ali məktəbləri yüksəliş dövrünü yaşayır. Son 20 ildə ilk
dəfə ən yaxşı 200 universitet sırasında 24 Asiya
universiteti yer alıb. Onlardan 2-si ilk "25-lik"-də,
6-sı 50 ən yaxşı universitet sırasında qərarlaşıb.
Asiyada bir nömrəli mövqe Yaponiyaya məxsusdur. Ən yaxşı
200 universitet sırasında Türkiyə 4 universitetlə -
Orta Doğu Texnik Universiteti (85), Boğaziçi
Universiteti (139), İstanbul Texnik Universiteti
(165), Sabançı Universiteti (182) təmsil olunub.
Reytinq ali məktəblərin fəaliyyətini 13 əsas
kriteriya - elmi-tədqiqatlar, biliklərin ötürülməsi,
beynəlxalq perspektivlər və dünya reytinqləri üçün
unikal hesab olunan - tədris mühiti və s. üzrə
qiymətləndirib.
Reytinqlə daha ətraflı
www.timeshighereducation.co.uk/worlduniversity-rankings/2014-15/world-ranking
səhifəsindən tanış olmaq olar.
|
