|
 Azərbaycan
Respublikası Təhsil Nazirliyinin və İndoneziyanın
ölkəmizdəki səfirliyinin təşəbbüsü ilə "Şagirdlərin
Mübadilə Proqramı" çərçivəsində İndoneziyanın Beynəlxalq
Qlobal Caya məktəbinin bir qrup müəllim və şagirdi
Bakıdakı 6 nömrəli məktəb-liseydə olub.
Səfər çərçivəsində həm indoneziyalı, həm də azərbaycanlı
şagirdlər ölkələrinin mədəniyyət və ədəbiyyat
nümunələrini təqdim ediblər. Onlar bir həftə ərzində
azərbaycanlı ailələrdə yaşayıblar. İndoneziyalı
şagirdlər ilk öncə məktəblə yaxından tanış olaraq
dərslərdə iştirak ediblər. Proqram çərçivəsində
həyata keçirilmiş görüşlər, konsert proqramları,
gəzintilər, məktəblə tanışlıq qarşılıqlı səfərlərin
davamlılığına səbəb olacaq, dost ölkələrin
məktəbliləri arasında ünsiyyətin artması üçün şərait
yaradacaqdır. Bu həm də onunla önəmlidir ki, hər iki
ölkə məktəblilərinin bir-birindən öyrənə və faydalana
biləcəyi şeylər çoxdur.
Fürsətdən istifadə edib indoneziyalı şagirdlərin bir
neçəsi ilə görüşüb təəssüratlarını bizimlə bölüşməyi
xahiş etdik.
"Bakını çox sevdim"
Nadya Madeline:
- Sizin paytaxtınızı gəzdim, Bakını çox sevdim. Burada
diqqətimi ən çox çəkən insanlarınızın səmimi və gülərüz
olmasıdır. Bakı şəhərindəki binaların arxitektur
görünüşünü də çox bəyəndim. Bura gəlişimizdə əsas məqsəd
İndoneziya və Azərbaycan mədəniyyətləri arasındakı
dialoqu formalaşdırmaqdır. Çoxlu gəziləsi və görüləsi
yerlərdə olduq, tarixi abidələrinizi ziyarət etdik.
Burada biz öz mədəniyyətimizi nümayiş etdirməklə yanaşı,
sizin mədəniyyətinizlə də yaxından tanış olduq.
Doğrusu, Azərbaycandan getmək istəməzdim. Nə vaxtsa
paytaxtınıza yenidən qayıdacağam, buna söz verirəm.
Ölkəmizə qayıdanda indoneziyalı dostlarıma Heydər
Əliyev Mərkəzində, Şəhidlər xiyabanında, Şirvanşahlar
Sarayında, Qız Qalasında, Dənizkənarı Milli Parkda və
digər yerlərdə gördüklərimiz barədə, möcüzələr
məskəninə çevrilən Bakınız haqqında ürəkdolusu söz
açacağam.
"Dərslər
çox xoşuma gəldi"
Priscilla Angkasa:
- Burada keçilən dərslər çox xoşumuza gəldi. Biz
7-9-10-11-ci siniflərdə dərslərdə iştirak etdik. Uşaqlar
çox fəal idilər, sual-cavabda aktiv iştirak edirdilər.
Artıq özümüzə çoxlu qız və oğlan dostlar da tapmışıq.
Burada hamı mehriban və səmimidir. Azərbaycanlılar çox
qonaqpərvərdirlər. Bir həftə ərzində qonaq olduğum ailə
məni heyran etdi. Onlara göstərdikləri diqqət və
qayğıya görə təşəkkür edirəm. Hətta mənə rus və
Azərbaycan dillərində danışmağı da öyrədirdilər.
Yeməklərinə gəlincə isə çox dadlı xörəklər bişirirdilər:
dolma, küftə, kabab çox ləzzətli idi.
"Nağıllar aləminə düşdük"
Kim Jae Ha:
- Mədəniyyətinizin, incəsənətinizin tarixini yaşadan
muzeylərinizdə tanış olduğumuz eksponatlar bizim
Azərbaycan haqqında düşüncələrimizi çox artırdı. Biz bu
şəhərdə, sözün əsl mənasında, nağıllar aləminə düşdük.
Bir sözlə, bol-bol təəssüratla vətənimizə qayıdacağıq.
Sifai SƏFƏROVA,
foto Rəşad ZİYADOVUNDUR,
"Azərbaycan müəllimi" |
