|
Rusiyanın Omsk şəhərində ikiqat olimpiya, dünya və
Avropa çempionu Aleksey Tişenkonun şərəfinə keçirilən
beynəlxalq boks turniri başa çatıb.
Yarışda yerli idmançılarla yanaşı, Azərbaycan,
Qazaxıstan, Türkmənistan, Qırğızıstan və Özbəkistan
boksçuları da qüvvələrini sınayıblar. Boks üzrə yığmamız
Omskda 3 qızıl və 2 bürünc medala layiq görülüb. Belə
ki, millimizin üzvlərindən Avropa çempionu Salman
Əlizadə finalda Rusiya idmançısı Yeprem Qriqoryanı
məğlub edərək fəxri kürsünün ən yüksək pilləsinə qalxıb.
Azərbaycan çempionatının mükafatçısı İbrahim İbrahimov
da turniri qızıl medalla başa vurub. Boksçumuz həlledici
görüşdə Qırğızıstan idmançısı Kanatbek Abduvahabovu
üstələyib.
Gənclər arasında dünya birinciliyinin mükafatçısı Pərviz
Bağırov da məşqçilərin etimadını doğruldub. Həmyerlimiz
finalda rusiyalı Arman Kurmanalinovu məğlub edib. Digər
təmsilçilərimizdən Tural Əhmədov və İman Əhmədli turniri
bürünc medalla başa vurublar. Komandamızın üzvlərindən
yalnız Elvin İsayev yarışı mükafatsız yekunlaşdırıb. |
