|
 ...Elə
bil hansısa sehr onları doğma evlərindən, sevimli
oyun-oyuncaqlarından ayırıb, ilk baxışdan bir qədər
anlaşılmaz görünən, amma möcüzə təsiri bağışlayan bir
aləmə gətirib çıxarmışdı. Məktəbin həyətində yeni tədris
ilinin coşqusu yaşandığı bir vaxtda bu fidanların ürkək
baxışlarında həyəcan, narahatlıq ağır yük kimi asılıb
qalmışdı. Hətta bəzilərinin bu "yük"ün ağırlığından
yanaqlarında muncuq kimi ağappaq, işıqlı nur
damlalarının sıralanmasından belə xəbəri yox idi. Onlara
dikilən gülümsər baxışlar belə, məktəbli geyimində
olduqca şirin, gözəl-göyçək görünən bu uşaqları bir an
da olsun xəyallarından ayırmaq gücündə deyildi. Həmin
anlarda birincilərin nə düşündüyünü, hansı arzularla
baş-başa qaldığını fərəhindən qanad açan valideynlər
belə bilməzdilər. Mikrofon qarşısından müəllimləri,
məktəbliləri salamlayan, onları ilk dərs günü münasibəti
ilə təbrik edən aparıcılar Aynur Abbasova ilə Ceyhun
Məmmədlinin ürək sözləri onlar üçün, nə qədər qəribə
görünsə belə, maraqlı idi.
Bakıdakı 263 nömrəli tam orta məktəbin direktoru Nəsimi
Abbasovun çıxışında "Bilik Günü"nə toplaşanların hər
birində iftixar hissi yaradacaq faktlar sadalandı.
Builki məzunlarından 55 nəfərinin ali məktəb tələbəsi
adını qazanması Xətai rayonunun qabaqcıl təhsil
müəssisələrindən sayılan bu məktəbin inkişaf
göstəricilərindən biri kimi qiymətləndirildi.
Söz birincilərin müəllimlərinə verildi. Rəhimə Rzayeva,
Yeganə Ağayeva, Sarıtel Quliyeva, Leyla Şahbazova,
Yeganə Orucova, Sabir Əliyev məktəbə ilk qədəmlərini
qoyan fidanlara ən xoş arzularını yetirdilər.
Müəllimlərin onlara üz tutub, "Sizin məktəbli ömrünüzün
ən şirin anları başlayır" - deməsilə birincilərin
çöhrəsi işıqlandı. Üzləri güldü. Ürəklənib, ilk dəfə
gördükləri böyük bir izdihamın qarşısına çıxdılar.
Əlinin, Aminin, Aliyənin, Aydanın, Aylinin, Tunayın,
Nurayın, İbrahimin, Xədicənin dillərində misralanan
şeirlər yaz yağışı kimi könüllərə səpildi. Bu misralarda
Vətənimiz tərənnüm olundu. Onlar üçrəngli bayrağımıza
sevgilərini ürəkdən gələn uca səslə söyləyirdilər. Bu
unudulmaz anlarda tədbirin qonaqları - hərb tariximizin
yorulmaz tədqiqatçısı, tanınmış publisist, nasir
Şəmistan Nəzirli, Xətai Rayon Gənclər və İdman
İdarəsinin rəisi Əfqan Rzayev ən şirin arzularını
məktəbli adının həyəcan dolu sevincini yaşayan
birincilərə ünvanladı.
Birincilərin hərəsi bir nəğməyə döndü. Onların məktəb
sevinci mahnı olub ətrafa yayıldı. Yaşlarına xas olan
cingiltili səslərinin şirinliyinə tədbir
iştirakçılarının alqışı qoşuldu. Valideynlər söz alıb,
övladlarına doğma balaları kimi qucaq açan müəllimlərə
təşəkkürlərini bildirdillər, pedaqoji kollektivə və
şagirdlərə yeni tədris ilində uğurlar arzuladılar.
...İlk zəng səsi. Əlinin, Leylanın, Aliyənin körpə
əllərilə başları üzərinə qaldırdıqları simvolik işarə
hamını sinif otaqlarına səslədi.
Məktəb sevinirdi, - nə müddətdir darıxdığı şagirdlərin
sırasına yeniləri qoşulduğu üçün. Siniflərdə isə
birinciləri bir qədər əvvəl səsini eşidib, öyüdlərini
dinlədikləri Şəmistan müəllimin - Azərbaycanımızın
görkəmli hərbçiləri, ziyalıları haqqında sanballı
tədqiqatların, əsərlərin müəllifi Şəmistan Nəzirlinin
ilk dərsi - "vətənpərvərlik dərsi" gözləyirdi.
Nazim ƏLİFOV |
