|
 Akademik
Zərifə Əliyeva adına liseydə yeni dərs ilinin başlanması
münasibəti ilə tədbir keçirilib. Tədbirdə liseyin
direktoru Məhəbbət Vəliyeva çıxış edərək şagirdləri,
müəllim kollektivini və valideynləri "Bilik Günü"
münasibəti ilə təbrik edib. Liseyin ötən dərs ilində
əldə etdiyi nailiyyətlər haqqında məlumat verən M.
Vəliyeva bildirib ki, liseyin 188 məzunundan 56 nəfəri
qəbul imtahanlarında 600-dən çox bal toplayaraq nüfuzlu
ali təhsil müəssisələrinin tələbəsi adını qazanıb.
Builki dərs ilində liseydə 655 şagird təhsil alır. Ötən
illərdən fərqli olaraq liseydə bu il 8-ci siniflər
açılıb.
Tədbirdə iştirak edən qonaqlar da yeni dərs ilinin
başlanması münasibəti ilə şagirdləri təbrik edib, onlara
dərslərini yaxşı oxumağı və həmişə müəllimlərinin
tapşırıqlarına əməl etməyi, Vətənimizə layiq şəxsiyyət
kimi formalaşmağı tövsiyə ediblər.
Tədbirdə liseyə işə yeni qəbul olunmuş üç müəllimin
andiçmə mərasimi keçirilib. Daha sonra ötən dərs ilinin
məzunları arasında ən çox bal toplayan, təhsildə əldə
etdiyi uğurlara görə qızıl medala layiq görülən, həm də
eyni anda 3 ali məktəbə daxil olub, hazırda Türkiyənin
Bilkənt Universitetinə 100% təqaüd qazanmış Elvin
Hacızadənin valideyni çıxış edərək övladının qazandığı
nailiyyətlərdə liseyin müəllimlərinin əvəzsiz rolunu
qeyd edib, onlara öz minnətdarlığını bildirib.
Liseyin şagirdləri və incəsənət xadimləri ifa etdikləri
musiqi nömrələri ilə tədbir iştirakçılarını təbrik
ediblər. Nəhayət, hamının həyəcanla gözlədiyi yeni
dərs ilinin ilk zəngi səslənərək şagirdləri sinif
otaqlarına dəvət edib.
Rəşad RAMAZANOĞLU,
"Azərbaycan müəllimi" |
