|
Sentyabrın 18-də Təhsil Nazirliyinin dəstəyi ilə
"İçərişəhər" Dövlət Tarix-Memarlıq Qoruğu İdarəsinin
"Marionet" teatrı Bakının Şüvəlan qəsəbəsindəki
sağlamlıq imkanları məhdud uşaqlar üçün 12 nömrəli
xüsusi internat məktəbində "Arşın mal alan" operettasını
nümayiş etdirib.
"Milli Musiqi Günü" münasibətilə hər il ənənəvi olaraq
keçirilən və sentyabrın 20-dək davam edən bu aksiyada
internat məktəbinin şagirdlərinə hər gün iki tamaşa
göstəriləcək. Tədbirdə Sağlamlıq imkanları məhdud
uşaqlar üçün 12 nömrəli Xüsusi internat məktəbinin
şagirdləri ilə yanaşı, Valideyn himayəsindən məhrum
olmuş uşaqlar üçün 1 və 2 nömrəli tam orta internat
məktəbləri, 11 nömrəli İnteqrasiya təlimli internat
məktəbi və 1 nömrəli Ailə tipli kiçik qrup evinin
şagirdləri iştirak edir.
Ümummilli lider Heydər Əliyevin təşəbbüsü ilə 1995-ci
ildən başlayaraq 18 sentyabr ölkəmizdə "Üzeyir musiqi
günü" kimi qeyd edilir. Həmin dövrdən başlayaraq musiqi
xəzinəmizin dünyada tanıdılması istiqamətində aparılan
işlər artıq öz bəhrəsini verməkdədir. Bu sahədə Heydər
Əliyev Fondunun həyata keçirdiyi tədbirlər öz miqyası
ilə seçilir. Dahi Azərbaycan bəstəkarı Üzeyir
Hacıbəylinin ölməz "Arşın mal alan" operettasının 100
illik yubileyinin YUNESKO-nun 2012-2013-cü illər üçün
"Görkəmli şəxslərin və əlamətdar hadisələrin yubileyləri
proqramı"na daxil edilməsi bunun bariz nümunəsidir. |
