|
 Sentyabrın
15-də Bakı şəhərindəki 287 nömrəli "Zəkalar" liseyində
yeni tədris ilinin başlanmasına həsr olunan tədbir
keçirilib.
Tədbirdə təhsil nazirinin müavini Firudin Qurbanov,
Xətai Rayon İcra Hakimiyyəti başçısının birinci müavini
Rafiq Quliyev və digər qonaqlar iştirak edib.
Tədbiri giriş sözü ilə açan liseyin direktoru, əməkdar
müəllim Aygün Əhmədli rəhbərlik etdiyi təhsil müəssisəsi
barədə məlumat verib. 1992-ci ildə yaradılan lisey
Azərbaycan təhsilində yeni ənənələrin təşəbbüskarı kimi
tanınıb. Hər il yüksək göstəriciləri ilə ictimaiyyətin
diqqətini cəlb edən "Zəkalar"ın adı son 10 ildə
ölkəmizin 15 ən yaxşı məktəbinin sırasındadır. Ötən
tədris ilində liseyin ali məktəblərə qəbul
imtahanlarında iştirak edən məzunlarından iki nəfəri
700, 20 nəfəri 600-dən yuxarı bal toplayıb. Onlardan 3-ü
medalçıdır.
Ötən tədris ili ərzində "İstedadların hazırlığı
laboratoriyası" layihəsi çərçivəsındə keçirilən
Respublika olimpiadasının final turunda Bakı şəhəri üzrə
iştirak edən 30 şagirddən 10 nəfəri "Zəkalar" liseyinin
yetirməsi olub.
Təhsil nazirinin müavini Firudin Qurbanov tədbir
iştirakçılarına təhsil naziri Mikayıl Cabbarovun
salamlarını və təbrikini çatdıraraq qeyd edib ki, əsası
ümummilli lider Heydər Əliyev tərəfindən qoyulan milli
təhsil strategiyası bu gün də uğurla davam etdirilir.
Yeni tədris ili münasibətilə pedaqoji kollektivi və
şagirdləri təbrik edən nazir müavini liseyin digər
məktəblər üçün örnək olduğunu vurğulayıb. Firudin
Qurbanov çıxışında liseyin şagird, müəllim və
valideynlərini "Bilik Günü" münasibətilə bir daha təbrik
edərək bu məktəbin əsasını qoyan və pedaqoji
fəaliyyətini ömrünün sonunadək təhsil ocağında davam
etdirən Rafil İmanovun xatirəsini ehtiramla yad edib.
Xətai Rayon İcra Hakimiyyəti başçısının birinci müavini
Rafiq Quliyev son illər sürətlənən məktəb tikintisi,
təmir işləri barədə məlumat verərək rayonun bütün tədris
ocaqlarında pedaqoji heyət və təhsilalanlar üçün
nümunəvi şərait yaradılmasının vacib iş olduğunu
bildirib.
Daha sonra valideynlər adından çıxış edən Azərbaycan
İnternet Forumun prezidenti Osman Gündüz müəllimləri və
şagirdləri təbrik edib, yüksək keyfiyyətli təhsilin
insanın həyatında oynadığı roldan danışıb.
Tədbirdə Təhsil Nazirliyinin adından liseyin 6 nəfər
Prezident təqaüdçüsünə hədiyyələr təqdim olunub.
Rəsmi mərasimdən sonra məktəblilərin ifasında kiçik
bədii hissə nümayiş olunub. |
