|
Azərbaycan Dövlət İqtisad Universitetinin bütün tədris
binalarında 2014-2015-ci dərs ilinə hazırlıqla bağlı
rektorun dekan və kafedra müdirləri ilə görüşü
keçirilib. Görüşdə qarşıda duran aktual məsələlər
müzakirə edilib.
Tədris binalarına baxış zamanı universitetin
maddi-texniki bazasının mövcud vəziyyəti, o cümlədən
auditoriyaların kompüter, "ağıllı lövhələr" və
proyektorlarla təchizatına nəzər yetirilib. Tədris
binalarının ərazisində yaradılan yüksək sürətli
internet şəbəkəsinin vəziyyəti də diqqət mərkəzində olub.
Sonra tədris prosesinə hazırlıqla bağlı geniş
müzakirələr aparılıb. Tədrisin keyfiyyəti və dərs yükü
bölgüsünün normaya uyğunluğu, tədris-metodiki
vəsaitlərin elektronlaşdırılaraq universitetin saytında
yerləşdirilməsi, müəllimlərin fərdi işçi planı və
tələbələrin fərdi iş planının hazırlıq prosesi nəzərdən
keçirilib. Əlavə olaraq, tədris zamanı istifadə edilən
dərsliklər və tövsiyə olunan ədəbiyyat siyahısının
universitet kitabxanasında mövcudluğu məsələsinə də
baxılıb. Qeyd olunub ki, tədris ili boyunca
valideynlərlə iş xüsusi diqqətdə saxlanılmalı, yeni
qəbul olunan tələbələr daim qayğı ilə əhatə olunmalıdır.
Görüşdə sentyabr-oktyabr ayları ərzində prorektorların
müvafiq tədris binalarına təhkim olunacaqları
bildirilib.
Hicran ƏKBƏROVA,
"Azərbaycan müəllimi" |
