|
 Sentyabrın
7-də Azərbaycan Respublikası Təhsil Nazirliyinin təsis
etdiyi "Bilik kuboku" uğrunda breynq-rinq yarışlarına
start verilib.
"Azərbaycan Televiziya və Radio Verilişləri" QSC ilə
birlikdə reallaşdırılan və hər həftənin bazar günü "AzTV"
kanalı vasitəsi ilə yayımlanması nəzərdə tutulan bu
intellektual oyunlarda ölkəmizin 15 bölgəsini təmsil
edən 30 komanda iştirak edir. Bunlar aşağıdakılardır:
"Bakı Dövlət Universiteti", "Azərbaycan Aviasiya
Akademiyası", "Qafqaz Universiteti", "Bakı Ali Neft
Məktəbi", "Mingəçevir", "Göy-göl", "Gəncə", "Şəmkir",
"Azərbaycan diyarı", "Aypara", "Siyəzən", "Naxçıvan",
"Bərdə", "Fortuna" "Orion", "Şabran", "Para Bellum",
"Lənkəran", "Allians", "Nur", "Kapital Bank",
"Sumqayıt", "Xızı", "Norm sement", "Mərdəkan", "Göyçay",
"Qəbələ", "Ağdaş", "Beyləqan".
Breyn-rinqin sentyabrın 7-də "Az TV" kanalı ilə
yayımlanan ilk oyununda Azərbaycan Respublikasının
təhsil naziri Mikayıl Cabbarov iştirak edib.
Öncə oyunların aparıcısı və baş hakimi DJ Fateh ölkədə
geniş populyarlıq qazanmış bu yarışma və onun keçirilmə
qaydaları haqqında məlumat verib. Komandaların üzvlərini
və tamaşaçıları salamlayan DJ Fateh breyn-rinqin 4-cü
mövsümünün başlandığını və bu gün (sentyabrın 7-də)
mövsümün ilk oyununun keçirildiyini bildirib. O,
intellektual oyuna verdiyi dəstəyə görə Heydər Əliyev
Fonduna, Azərbaycan Respublikası Təhsil Nazirliyinə,
Azərbaycan Respublikası Gənclər və İdman Nazirliyinə
təşəkkür edib. Oyunların Dövlət Bayrağı Meydanının
ərazisində yerləşən "Baku Crystal Hall"da keçirildiyini
diqqətə çatdıran aparıcı verdikləri dəstəyə və
oyunların yüksək səviyyədə keçməsinə lazımi şərait
yaratdığına görə sarayın hər bir əməkdaşına
minnətdarlığını bildirib.
Təhsil Nazirliyinin İnsan resursları şöbəsinin müdir
müavini İlham Nağıyevin və baş sponsor "Nar Mobile"
şirkətinin ictimaiyyətlə əlaqələr departamentinin
ünsiyyət vasitələri şöbəsinin rəhbəri Nigar Arpadarainin
"Bilik kuboku" uğrunda breyn-rinq oyunlarının müstəqil
hakimləri olduğu diqqətə çatdırılıb.
Məlumat verilib ki, oyunlar yaxın 4 ay ərzində
keçiriləcək və 15-ci oyunda Azərbaycan Respublikası
Təhsil Nazirliyi tərəfindən təsis olunmuş "Bilik kuboku"nun
sahiblərinin adları bilinəcək. Həmin oyunda 3 ayın -
sentyabr, oktyabr və noyabr aylarının çempionları
iştirak edəcək. Birinci oyunda isə sentyabrın ilk
finalçısı müəyyənləşəcək.
Oyunların baş hakimi və aparıcısı Fateh intellektual
yarışmanın mükafat fondu barədə də bilgi verib. Qeyd
olunub ki, "Bilik kuboku"nun sahibləri Təhsil Nazirliyi
tərəfindən elektron kitab oxuyucuları ilə
mükafatlandırılacaqlar. Hər zaman elmi bilikləri təşviq
edən "Nar Mobile" operatoru öz ənənəsinə sadiq qalaraq
bu dəfə də breyn-rinq intellektual yarışmasının
qaliblərinə həvəsləndirici hədiyyələr təqdim edəcək.
Verilişin maliyyə sponsoru "Kapital Bank" isə qalib
gələcək komandaya hesabında 3 min AZN olan plastik kart
təqdim edəcək.
Aparıcı oyunun qaydalarından da danışıb və bildirib ki,
hər oyun iki seçim və iki final görüşündən (televiziya
versiyası ilə döyüşündən) ibarətdir. Bütün görüşlər
komandalardan biri 5 xal toplayana qədər oynanacaq. İlk
oyunda qalib gələn komanda finalda oynamaq şansı
qazanacaq və sentyabr ayının finalı uğrunda mübarizə
aparacaq.
Sonra 4-cü mövsümün ilk oyunu keçirilib. İlk seçim
görüşündə "Bilik kuboku"nun son sahibi "Norm sement"
komandası ilə "Fortuna" komandası qarşılaşıb. Qırmızı
masa arxasında əyləşən "Norm sement" komandası yaşıl
masada əyləşən rəqiblərinə 5-1 hesabı ilə qalib gəlib.
İkinci seçim görüşü "BDU" ilə "Aviasiya Akademiyası"
komandaları arasında olub. Gərgin keçən bu mübarizə
qırmızı masada yarışan "BDU" komandasının azacıq
üstünlüyü ilə (5-4) başa çatıb.
Birinci final döyüşü "Norm sement" və "BDU" komandaları
arasında olub və "Norm sement" qalib gəlib: 5-0. Növbəti
final görüşü də bu iki komanda arasında baş tutub və bu
dəfə də yaşıl masada yarışan "Norm sement" qalib olub:
5-0. Beləliklə, "Norm sement" sentyabr ayının finalında
oynamaq hüququ qazanıb.
Yusif ƏLİYEV,
"Azərbaycan müəllimi" |
