|
Azərbaycanın birinci xanımı Mehriban Əliyeva doğum
gününü uşaqlarla birlikdə qeyd edib.
Avqustun 26-da Heydər Əliyev Fondunun təşkilatçılığı ilə
uşaqlar üçün şənlik keçirilib.
Tədbirdə uşaq evləri və internat məktəblərindən, Daun
Sindromlu Şəxslərin Assosiasiyasından gəlmiş 400-ə yaxın
uşaq iştirak edib.
Heydər Əliyev Fondunun vitse-prezidenti Leyla Əliyevanın
və Arzu Əliyevanın da iştirak etdikləri tədbirdə
Azərbaycanın birinci xanımı ətrafına toplaşmış uşaqların
sevincini bölüşüb, onlarla səmimi söhbət edib. Bununla
da xeyriyyəçiliyi, böyüməkdə olan nəslin hərtərəfli
qayğı ilə əhatə olunmasını, müxtəlif humanitar
aksiyaları fəaliyyətinin prioritet istiqamətlərinə
çevirən Heydər Əliyev Fondunun prezidenti paytaxtdakı
uşaq müəssisələrinin sakinlərinə növbəti dəfə unudulmaz
bir gün yaşadıb. Tədbirdə balacalar üçün qurulan, əsl
bayram ab-havası yaradan dekorasiyalar uşaqların
əhval-ruhiyyəsini daha da yüksəldib. Uşaqlar müxtəlif
rəqslər və mahnılar ifa etdilər.
Balacalar yalnız uşaqlara xas olan qayğısızlıqla
ətrafdakılarla öz sevinclərini bölüşdülər. Bu təbəssümü
isə onlara Mehriban Əliyeva bəxş etdi. Fondun təşkil
etdiyi növbəti xeyriyyə aksiyası sayəsində uşaqlar daha
bir mənalı və yaddaqalan gün yaşadılar.
Azərbaycanın birinci xanımının rəhbərliyi ilə Heydər
Əliyev Fondu yarandığı gündən indiyədək çoxlu sayda
humanitar layihələr həyata keçirib. Fondun fəaliyyət
proqramına təhsil, səhiyyə sahələri, uşaq evləri və
internat məktəblərinin maddi-texniki təchizatı,
ictimaiyyətin bu prosesdə iştirakının fəallaşdırılması
sahəsində işlər daxildir. Fəaliyyətində "Uşaqlara
yaxşılıq nə qədər çox olsa, yenə də azdır" şüarını əsas
götürən Mehriban Əliyevanın xüsusi qayğıya ehtiyacı olan,
valideyn himayəsindən məhrum, kimsəsiz uşaqlara qayğı
missiyasına uyğun olaraq Bakı şəhərinin internat
məktəbləri və uşaq evləri üzrə hazırlanan proqram bu
istiqamətdə həyata keçirilən ən mühüm tədbirlərdəndir.
Heydər Əliyev Fondunun prezidenti Mehriban Əliyeva,
Fondun vitse-prezidenti Leyla Əliyeva və Arzu Əliyeva
uşaqlarla birgə rəqs etdilər.
Tədbirdə uşaqların istedadlarını nümayiş etdirmələri
üçün xüsusi guşələr də yaradılmışdır.
Balacaların sevimli cizgi filmlərinin qəhrəmanlarını
canlandıran personajlar, səhnəciklər, oynaq, şux
mahnılar, rəqslər tədbiri daha da rəngarəng etdi.
Şənlikdə uşaqlara Heydər Əliyev Fondu tərəfindən
hazırlanmış hədiyyələr təqdim olundu.
AzərTAc |
