|
Azərbaycan Güləş Federasiyasının (AGF) 1 saylı
nümayəndəliyinin tərkibində fəaliyyət göstərən klublarda
məşğul olan sərbəst və yunan-Roma güləşi üzrə
2000-2001-ci illər təvəllüdlü yeniyetmələr arasında
təsnifat yarışları keçirilib. Yarışın keçirilməsində
əsas məqsəd yeniyetmələr arasında sərbəst və yunan-Roma
güləşi idman növlərinin inkişafına və kütləviliyinə nail
olmaq, 1 saylı nümayəndəliyin tərkibində fəaliyyət
göstərən klublarda çalışan məşqçilərin işini
qiymətləndirmək, ehtiyyat qüvvələri və perspektivli
güləşçiləri aşkarlamaqdır.
Beynəlxalq Güləş Federasiyasının (FİLA) qaydalarına
əsasən keçirilən yarışda 10 çəki dərəcəsində idmançılar
mübarizə aparıblar.
Tofiq Bəhramov adına Respublika Stadionunun güləş
zalında keçirilən yarışların ilk günündə sərbəst
güləşçilər döşək üzərinə çıxıblar. Şəxsi xarakter
daşıyan turnirin ikinci günündə isə yunan-Roma
güləşçiləri mübarizəyə başlayıblar. Qaliblər Azərbaycan
Güləş Federasiyası tərəfindən medal, diplom və müxtəlif
hədiyyələrlə təltif olunublar. |
