|
Zərdab şəhərində ümummilli lider Heydər Əliyevin
adını daşıyan parkda Heydər Əliyev Mərkəzi fəaliyyət
göstərir. Bura yeniyetmə və gənclərin ən çox
sevdikləri mədəniyyət ocağıdır. Bu yay tətili
günlərində mərkəzə gələnlərin sayı daha çoxdur. Gözəl
memarlıq nümunəsi olan bu ikimərtəbəli binada
məktəblilərin asudə vaxtlarından səmərəli istifadə
etməsi, onların mənəvi ehtiyaclarının ödənilməsi üçün
hər cür şərait yaradılıb. Mərkəzə gələnlər öncə ulu
öndərin həyatını və çoxşaxəli dövlətçilik
fəaliyyətinin müxtəlif dövrlərini əks etdirən
materiallar, tarixi sənədlər, eksponatlar, dahi rəhbərin
müxtəlif illərdə Zərdaba səfərlərinə dair fotoşəkillərlə
tanış olurlar.
Qeyd edək ki, mərkəzdə məktəblilərin Azərbaycanın zəngin
tarixini dərindən öyrənmələri üçün xüsusi dərnəklər
fəaliyyət göstərir. Xalçaçılıq, rəsm və şahmat
dərnəklərinə yeniyetmələr tez-tez baş çəkir və onları
maraqlandıran suallara yerindəcə cavab taparaq bu
sahədə bilik və bacarıqlarını artırırlar. |
