|
Mədəniyyət ilinə həsr olunmuş rus dili və ədəbiyyatı
üzrə respublika olimpiadasının qalibləri, Rusiya
İnformasiya və Mədəniyyət Mərkəzi nəzdində "Sozvezdiye"
yaradıcı gənclər klubunun üzvləri Rusiyaya
maarifləndirici tanışlıq səyahətindən qayıdıblar. Səfər
Rusiya Xarici İşlər Nazirliyinin və "Rossotrudniçestvo"
agentliyinin həyata keçirdiyi ənənəvi "Salam, Rusiya!"
layihəsi çərçivəsində baş tutub.
Azərbaycan gəncləri 8 gün ərzində Moskva, Vladimir,
Suzdal və Sergiyev Posad şəhərləri ilə tanış olublar.
Maraqlı tarixi və mədəni ekskursiya marşrutları onların
dünyagörüşlərini genişləndirib. Azərbaycan gəncləri
Rusiya, Bolqarıstan, Livan, Sloveniya və Estoniyadan
olan yaşıdları ilə dostlaşıblar. Azərbaycan komandası
Moskvada və Suzdalda rəqs müsabiqələrində birinci yeri
tutaraq dostlarının rəğbətini qazanıb.
Azərbaycanın Rusdilli Təhsil Müəssisələrinin
Müəllimləri Assosiasiyasının sədri Yakunina Lyubov və
qrupu müşayiət edən nümayəndələr bildiriblər ki, səyahət
zamanı gənclərimiz Azərbaycanı layiqincə təmsil
ediblər.
Sifai SƏFƏROVA,
"Azərbaycan müəllimi" |
