|
Bakı Slavyan Universitetində (BSU) Misir Ərəb
Respublikasının Azərbaycandakı səfirliyinin yeni təyin
olunmuş mədəniyyət attaşesi, Bakıdakı Misir Mədəniyyət
Mərkəzinin direktoru, azərbaycanşünas alim Əhməd Sami El
Aydi ilə görüş keçirilib.
Universitetin mətbuat xidmətindən AzərTAc-a bildiriblər
ki, BSU-nun rektoru, professor Asif Hacıyevlə görüşdə
gələcəkdə Misir universitetləri ilə əlaqələrin inkişaf
etdirilməsi, tələbə-müəllim mübadiləsi, ortaq
mədəniyyətlərin dərindən öyrənilməsi məsələləri müzakirə
olunub. Eyni zamanda hər iki xalqın yazıçı və
şairlərinin əsərlərinin birgə tərcüməsi ilə bağlı ilkin
razılıq əldə edilib.
Əhməd Sami Misirin aparıcı təhsil ocaqlarından olan Ayn-Şəms
Universitetində 1998-ci ildən Azərbaycan dilini tədris
etdiyini, Misirdə bu dilə çox böyük maraq göstərildiyini
bildirib. Misirli alim Azərbaycan dilinin daha geniş
öyrənilməsi üçün ixtisaslı mütəxəssislərə, müəllimlərə,
eləcə də Misirdə Azərbaycan Mədəniyyət Mərkəzinin
açılmasına böyük ehtiyac olduğunu vurğulayıb.
A.Hacıyev misirli həmkarları üçün BSU-da Azərbaycan dili
üzrə ixtisasartırma kurslarının təşkil olunmasına şərait
yaradılacağını söyləyib. Misir Ərəb Respublikasında
Azərbaycanı daha yaxından tanıtmaq məqsədilə bu ölkənin
universitetlərindən birində Azərbaycan Tədris Mədəniyyət
Mərkəzinin açılması haqqında müzakirələrin aparılacağı
vurğulanıb. |
