|
 Bu
barədə avqustun 18-də Bakı Şəhəri üzrə Təhsil İdarəsində
keçirilmiş brifinqdə məlumat verilib. Brifinqi açan
idarənin ictimaiyyətlə əlaqələr sektorunun müdiri Arzu
Tairquliyeva bildirib ki, Azərbaycan Respublikası
Prezidentinin 2013-cü il 24 oktyabr tarixli sərəncamı
ilə təsdiq olunmuş "Azərbaycan Respublikasında təhsilin
inkişafı üzrə Dövlət Strategiyası"nda bir sıra
məsələlərlə yanaşı təhsildə müasir tələblərə, çağdaş
dövrümüzün çağırışlarına cavab verən idarəetmə
sisteminin qurulması da öz əksini tapıb.
Dövlət Strategiyasına uyğun olaraq Təhsil Nazirliyi ötən
ilin noyabrında məktəb direktorlarının səriştəliliyinin
və idarəetmə bacarıqlarının artırılması təlimlərinə
başlayıb. Təlimlərin keçirilməsində əsas məqsəd müasir
idarəetmə bilik və bacarıqlarına, strateji düşüncə
tərzinə malik zəruri pedaqoji və psixoloji bilikləri
olan məktəb direktorları yetişdirməkdir. Təlimlərə qəbul
müsabiqə yolu ilə baş tutub və iştirak üçün 600-dən çox
məktəb direktoru və gələcəkdə bu vəzifədə çalışmaq
arzusunda olan şəxs müraciət edib.
Təlimlər zamanı təhsildə keyfiyyətin idarə edilməsi,
təhsilin hüququ və peşə etikası, kompüter və təlim
texnologiyaları, təhsildə statistika və təhlil, təhsildə
liderlik və təşkilatçılıq, psixologiya və fərdi inkişaf,
kurikulumun nəzəriyyəsi və tətbiqi, təhsildə maliyyənin
idarə olunması, məktəb icması və ictimaiyyətlə
münasibətlərin təşkili mövzuları tədris olunub. Təlimdən
müvəffəqiyyətlə keçən 42 nəfər "uğur sertifikati" əldə
edib.
"Uğur sertifikati" sahiblərindən 14 nəfərinin artıq Bakı
şəhərindəki məktəblərə direktor təyinatı aldığını
diqqətə çatdıran Arzu Tairquliyeva yeni təyin olunmuş
direktorların təlimdə qazandıqları biliklər və
bacarıqlar hesabına idarəetmə sisteminə yeniliklər
gətirəcəyinə ümid etdiklərini bildirib.
Təhsil Nazirliyinin təhsilin keyfiyyətinin
qiymətləndirilməsi sektorunun müdiri Emin Əmrullayev
yeni direktor təyinatı alanları təbrik edib.
Direktorlar və direktor işləmək istəyən şəxslər üçün
keçirilmiş təlimi uğurlu başlanğıc kimi dəyərləndirən
nazirliyin təmsilçisi sentyabr ayında növbəti mərhələdə
daha geniş və daha çox sayda müdavimlər üçün belə
təlimlərin təşkilinin planlaşdırıldığını, gələcəkdə isə
onun daha da təkmilləşdirilməsinin, coğrafiyasının
genişləndirilərək paytaxtla yanaşı bölgələrdə də təşkil
olunmasının nəzərdə tutulduğunu söyləyib. O, mövcud
layihənin direktorların təyinatı məsələsində şəffaflığı
təmin etmək, səriştəlilərə və peşəkarlara meydan vermək,
belələrinin karyera inkişafı baxımından da irəliyə
atılmış müsbət bir addım olduğunu bildirib.
"Uğur sertifikati" alanların maddi cəhətdən
stimullaşdırılması məsələsinə toxunan E.Əmrullayev yaxın
vaxtlarda onların əməkhaqqlarına əlavələrin verilməsi
qaydalarının təsdiqlənəcəyini diqqətə çatdırıb. Sektor
müdiri həmçinin "uğur sertifikati" sahiblərindən məktəb
direktorluğu ilə yanaşı direktor müavini vəzifəsində
işləyənlərin də olduğunu, onların bir qisminin isə
Təhsil Nazirliyinin struktur bölmələrində işə cəlb
edildiyini söyləyib.
Brifinqdə iştirak edən yeni təyin olunmuş direktorlardan
Günel Rəcəbova (60 nömrəli tam orta məktəb), Səidə
Zeynalova (texniki-humanitar lisey), Kərim Abdi (31
nömrəli tam orta məktəb) başa vurduqları təlimin
əhəmiyyətindən danışıb, onlara göstərilən etimadı
doğruldacaqlarını bildiriblər.
Sonda jurnalistlərin sualları cavablandırılıb.
Yusif ƏLİYEV,
"Azərbaycan müəllimi" |
