ARXİV

15 Avqsut 2014 - №31

Beynəlxalq təhsil xəbərləri

Sinifdə müxtəlif krossvordları həll etmək uşaqlarda intellekti gücləndirir 

Kembric Universitetinin alimləri belə qənaətə gəliblər ki, uşaqlara sinif məşğələlərində müxtəlif krossvordları həll etmək imkanı yaradılmalıdır.  Bu cür  məşğuliyyət uşaqlarda intellekti gücləndirir. Onlar uşaqların yaddaşını möhkəmlədir. Müxtəlif sözlü oyunlar isə uşaqların nitqini daha da sürətləndirir, onların söz ehtiyatını artırır. "The Daily Mail" qəzetinin yazdığına əsasən müəllimlərin 75 faizi öz dərslərində  bu və  ya  digər  formada müxtəlif  tapmacalardan  istifadə edir,  lakin onlar  bunu təhsilin keyfiyyətini yaxşılaşdırmaq üçün deyil,  uşaqları  məşğul etmək üçün edirlər.  Tədqiqatlar göstərir ki, tapmacalar  daha  geniş  potensiala malikdir  və  onlar uşaqların  psixoloji  və koqnitiv inkişafına müsbət təsir göstərirlər. Xüsusən də  7-11 yaşlı  uşaqlar  üçün olan tapmacalar daha faydalıdır.

Qırğızıstanda tələbələrin sayının azalması narahatlıq doğurur 

Qırğızıstanın ali məktəblərində tələbələrin sayının azalması tendensiyası müşahidə olunmaqdadır.  Bu barədə Qırğızıstanın təhsil və elm naziri Kanat Sadıkov  rəhbərlik etdiyi qurumun 2015-ci il üçün büdcə layihəsinin müzakirəsinə həsr olunmuş  iclasındakı çıxışında bildirib.  Onun sözlərinə görə, bu meyil  davam edərsə, iki ildən sonra tələbələrin sayı 2010-cu illə müqayisədə 2 dəfə az olacaq. 

"Ali təhsil sistemində tələbə sayının azalması müşahidə olunmaqdadır, biz  təhsilin bakalavriat və magistratura səviyyəsinə keçmişik, hər il ali  məktəblərimizə tələbə qəbulu 15-20 min nəfər azalır.  Ola bilər  bu onunla bağlıdır ki, biz qiyabi təhsilin formatını tam dəyişdik və  onu  distant  texnologiyaları  üçün  məcburi  şərt etdik.  Son 3 il ərzində  qiyabi  şöbələrə  qəbul 15 min nəfər təşkil edib", -  deyə nazir bildirib.  O  əlavə edib ki, Təhsil  və  Elm Nazirliyinin proqnozlarına əsasən 2017-ci ildə  tələbələrin ümumi sayı  150 min nəfərə çatacaq.  Belə olan halda nazirlik qarşısında duran əsas məqsəd  təhsil xidmətlərinin  keyfiyyətinin yaxşılaşdırılması olmalıdır.

MDU Çində beynəlxalq universitet yaradır 

M.V.Lomonosov adına Moskva Dövlət Universiteti Çində  beynəlxalq  universitet yaradır.  "Uçitelskaya qazeta"nın məlumatına əsasən, bu barədə artıq tərəflər arasında müqavilə imzalanıb.  MDU bazasında yaradılan beynəlxalq universitetdə Rusiyanın ən nüfuzlu ali məktəblərinin tədris proqramları və standartları əsasında təkcə Rusiya və Çində deyil, bütün dünyada tələbat duyulan ixtisaslar üzrə  yüksəkixtisaslı mütəxəssislər hazırlanacaq.  Hər iki  ölkənin  ali  rəhbərliyi tərəfindən dəstək qazanmış  layihədə  MDU  və  Çinin  Pekin Politexnik Universiteti tərəfdaş kimi çıxış edirlər.

Təhsil ocağında təkcə  Çin vətəndaşları deyil,  Rusiyanın  Uzaq Şərq vilayətləri və  Orta Asiya,  eləcə  də digər ölkələrdən olan tələbələr oxuyacaq. Tədris prosesinə  Rusiya və digər xarici ölkələrdən  ən yaxşı  mütəxəssislər cəlb olunacaq.

Tədris rus, ingilis və Çin dillərində aparılacaq. Məzunlar həm MDU-nun, həm də müştərək universitetin diplomunu alacaqlar.  Tələbələr icbari qaydada Rusiya və  Çinin  iri  şirkətlərində  təcrübə keçəcəklər.  MDU-nun rektoru, akademik  Viktor Sadovniçinin sözlərinə görə, universitet  ilk 5 min tələbəni 2015-ci ildə qəbul edəcək. Buna qədər isə gələcək tələbələrin rus dilini  öyrənmələri  üçün  hazırlıq  kursları  açılacaq.

Özbəkistan təhsil sistemi növbəti qrant alıb 

Özbəkistan  təhsil  sisteminin  inkişafı  üçün  49,9 milyon  ABŞ  dolları  həcmində növbəti qrant alıb.  Bu barədə  UNESCO-nun  Özbəkistan  üzrə  nümayəndəliyinin rəhbəri  Krista  Pikkat  bildirib.  Maliyyə  yardımı  təhsil sahəsində  Qlobal Tərəfdaşlıq  Fondunun  layihəsi əsasında  reallaşdırılıb.  Qrant təhsil  sahəsinin  daha da təkmilləşdirilməsinə, məktəbəqədər  təhsilin  keyfiyyətinin, eləcə də ümumtəhsil məktəblərində  tədris prosesinin  yaxşılaşdırılmasına  xidmət edəcək.  Layihə çərçivəsində  təhsil  sisteminin monitorinqinin təkmilləşdirilməsi  də  nəzərdə tutulub.